谭辉智15字回应追唔追多个小朋友 古淖文话演唱会“卖艺不卖身”
《中年好声音2》的三甲古淖文、谭辉智、颜米羔昨日（26日）出席活动，三人先在台上各自唱了一首歌，再合体唱一首《失恋阵线联盟》，台下超过二百位粉丝到场支持。目测以古淖文的粉丝最多，中间整个区域都是他的粉丝，而谭辉智及颜米羔的粉丝则占了两侧。
活动后三人接受访问被问到再合体表演的感受时，颜米羔大赞“好正”：“其实期待好耐，成日都撞唔啱啊，终于我哋又喺返埋一齐，好玩啊！头先喺台度都玩到唔记得自己唱紧咩。”谭辉智就表示玩到“出晒汗”：“每次见到佢两个都好开心，一定系欢笑，冇拣错人啊，真系好开心好Happy。”
谭辉智被问到今日在社交平台分享了一段与陈俞霏合拍的一段搞笑影片，陈俞霏以为谭辉智正在拍跳舞，但原来是在拍他自己，谭辉智表示：“其实揿错掣啰，自己衰。其实呢个系喺外国系好多人玩嘅，咁我哋就其实之前拍咗一套，同周Sir拍咗一套，咁啱𠮶一日嚟嘅。其实都仲有好多个都未出嘅，咁我哋系拍咗好多个，唔同类型嘅搞笑嘢，咁我觉得难得我哋咁多个聚埋一齐，谂到啲咩就拍啰。”颜米羔表示已经看了谭辉智的片：“啱啱今朝先睇，见到系唔敢饮水，唔敢食嘢㗎！”古淖文都表示陈俞霏之前已经让他看了：“咁我都觉得好好笑。”
古淖文谈到下月举办的演唱会突然表示“卖艺不卖身”，原来是早前有报道希望他在演唱会上可以“除衫”，但被“古粉”叫唔好：“一个就谭辉智，另外一个成日叫我除衫𠮶个呢，就系阿Paul啦，但系佢都阴公嘅，佢都成日俾人闹嘅，喺内心系好多人想。”虽然古淖文未必会“除衫”，但透露今次演唱会的衣著会比上次澳门站“Sexy少少”。
至于排练到如何，他则透露手头上还有工作，暂时是“各自修行”：“咁就自己都系练好身体啦，即系身体机能，跟住就记歌词啦，咁跟住我幕后嘅团队就帮我搞晒所有嘢。”到最后一星期他就会不停彩排，至于会否请嘉宾时，古淖文就表示今次不会请嘉宾：“今次就想真系自己唱歌俾大家，去多谢大家咁支持啦，同埋好多谢香港，即系有一个咁好嘅平台俾我，令到大家更认识。咁所以就自己唱晒，就唔请嘉宾啦。”
谭辉智表示刚刚过去的圣诞与家人去了“古淖文乡下”，而在活动时他表示要即场去逛街买礼物给儿女，原来他早已经叫儿女把愿望写给圣诞老人，自己则实现他们的愿望：“我叫佢话你写张卡畀圣诞老人，咁佢就会帮你买㗎啦，咁我就跟佢个list就执药咁，佢哋有愿望。”而古淖文及颜米羔则陪家人一起渡过。
古淖文就指与家人一起食宵夜是传统来的，更笑言爷爷以前会自己弄火鸡：“咁我阿爷以前就成个火鸡自己整啦，成旧金华火腿自己腌啰，以前仲疯狂㗎，现在收敛咗㗎啦！”
谭辉智被问到会多考虑多生一个小朋友时即表示“应该唔会”，但就被古淖文笑他说应该即是有点隐晦。谭辉智就说：“冇理由话肯定㗎嘛，有时不小心㗎嘛。”在说这句时谭辉智的女儿突然在休息室走出来看着爸爸，谭辉智即笑说：“我话口未完，个女即刻望住我啦。唔会啦，唔会啦！应该唔会！”