【任噏乱评】 林峰高温著丝绒　衣著品味潮过笼

艺人是份终生职业，没有下班时间，一日24小时都要扮靓靓，不论在舞台上，去搭飞机还是行紧返屋企，任何时候都有被影机会，随时都在最FIT状态真系讲就容易﹗如果本身没甚么FASHION SENSE，倒不如交给专业人士打造，例如女星现身机场打扮，已经成为赞助商必争之地，有钱收又唔怕著错衫变笑话，WIN-WIN﹗咁男星呢??男仔唔系西装就SMART CASUAL(坤哥本人定义较特别可以不理)，可以有几出事？

不如睇睇转攻内地又好耐无见嘅林峰，之前剃光头拍内地剧集极少曝光，拍毕后等头发长番终于可以靓仔示人，但日前以一身中国红造型出席演唱会宣传活动，应该属惊吓多于惊喜。演唱会记者会著红D较喜庆不为过，但都唔使全身红色啩？最劲系三四十度选择一套丝绒连身裤，挑战峰峰耐热程度吗？同色同质料腰带配银色方型扣，扎脚设计但橡筋外露，加上一对黑色短胶BOOT(相信是名牌但睇唔出)，品味嘅嘢……

曾几何时峰峰大爱斯文LOOK，每次现身都系西装裇衫，有时对鞋潮少少添新意，配上其180身高令不少女士颠倒。照道理出席记者会应该有形象指导，乜咁大整蛊呀……好，一两次失手唔应该入佢数，睇埋早多一星期峰峰出席剪彩活动靓相先﹗西装骨骨已经好稳阵，著出斯文型仔应该毫无难度，不过净灰色西装外套，配上格仔马甲西裤，点解会有爸爸当年拍婚纱照嘅感觉……

近半年峰峰只在七月出席呢两个公开活动，到底是人有失手还是内地工作太耐，散发另类衣著品味？实在有待下回分解。