中年好声音3｜周国丰冇帮伍仲衡口向TVB求情：唔方便去干涉件事

TVB歌唱真人骚《中年好声音3》昨日（15日）拍摄新一集内容，是自评审伍仲衡被飞出节目后再次拍摄，今次节目组找来陈奂仁及黄凯芹来做客席评判，但二人就未知会否成“长驻”评审。评审之一的周国丰接受《香港01》访问时就表示节目会不停为大家带来新鲜感：“正如阿妈之前佢见记者嘅时候讲咗啦，个节目我哋经常会有啲新鲜感畀大家，咁评审呢我哋系其中嘅一个嘅部分啦，咁大家都会睇过呢个节目嘅话呢都会明白，评审我哋经常都会转人，咁变咗我会视为一个正常嘅变化啰！”

周国丰觉得伍仲衡不再做评审后，不能再“窒”他：“我净系可以话冇得窒佢啰，不过要窒佢嘅话呢，基本上无论系幕前啦，幕后啦都可以窒佢嘅。”可见二人极友好，可以互相取笑而不生气。

周国丰与伍仲衡一向都被指是节目中的“左右门神”，给分准则极严，他被问到现在少了一位“门神”，会否怕评分没之前严谨，他则说不怕：“我又唔担心嘅，今次就𠮶两位嘉宾评审啦，陈奂仁啦同埋黄凯芹啦，我相信佢哋两个都系pro㗎㖞，咁所以喺咁嘅情况之下呢，我觉得每一集唔同嘅评审出现喺个节目当中，跟住佢哋一个标准佢哋把尺都唔同嘅时候呢，我又唔担心话会唔会好松啊，又或者同之前𠮶个标准唔同。”

周国丰被问到知否陈奂仁及黄凯芹是常驻评审时，他表示“真系不知”：“总之我就今日收到呢个制作组就系讲，今集呢就会系Chris同埋陈奂仁啰。咁我哋头先先喺度讲话陈奂仁咁啱佢个名就换人啰，于是就换咗换咗佢出现喺个节目当中，我唔知佢系唔系常驻，真系唔知。”

周国丰私下跟伍仲衡很“老友”，他被问到怎样看此事时，他觉得整件事可以处理得好一点：“既然系一个决定嘅时候，即系佢哋做个决定啦，我又会尊重佢个决定嘅，咁我私底之下有同佢去沟通，有同佢联系。咁其实正如佢自己喺直播当中讲啦，佢唔系好受影响嘅，佢亦都叫啲粉丝们就系继续支持中年好声音个节目啦，而佢就系本身喺音乐方面𠮶个创作又好啊，又或者喺音乐方面去推广，咁我作为朋友嘅话呢点都会支持嘅。”

周国丰认为今次伍仲衡是出事在“沟通”上：“我觉得始终系个沟通上面嘅问题，即系如果我觉得沟通得好啲嘅话，不过平时佢都系一个唔擅长沟通嘅人嚟㗎啦。咁所以发生咗呢件事，我只系觉得系如果沟通得好啲嘅话呢，就成个𠮶个譬如成件事𠮶个嘅结果，就会可以嚟得更加嘅好啲啰。”

周国丰被问伍仲衡离开后，节目会否少了欢乐，他继续表示“唔惊”：“始终我哋啲评审，即系除咗我啊、阿妈啊，或者系Clayton之外，会有啲唔同嘅嘉宾评审出现，咁佢哋每个都有唔同嘅风格嘅。譬如今集啦，有否陈奂仁啦，佢除咗你一个好出色音乐人之外，佢都系可以几搞笑。咁至于阿Chris，佢系我嘅广播界嘅前辈添啦，佢系可以好搞笑，亦都可以好尖酸刻薄，亦都可以词锋好锐利㗎。所以呢一方面，我又真系唔担心𠮶个节目嘅效果，或者成个出嚟嘅气氛系点样，我相信会有几大新鲜感。”

周国丰更透露伍仲衡“唔系好受影响”：“佢唔系好受影响，其实佢都好忙，咁至于我同佢都有一个网上嘅节目，咁我哋下星期五呢，就会有最新嘅一集㗎啦。咁𠮶一集，如无意外就应该访问我哋好想访问嘅一个人，亦都系我哋儿时嘅偶像，就系黄日华先生同埋Mimi罗敏庄。咁所以我嘅观察，我唔觉得佢有啲乜嘢，好大心情嘅低落，或者好受影响。”

至于伍仲衡被炒，作为好友的周国丰被问有否“帮口”向TVB求情，他表示：“因为始终我哋都系旁观者，又或者我哋都系局外人，当中𠮶啲仔细嘅情况系点，其实我都唔知嘅。头先我提及过啦，沟通方面做得好啲嘅话，咁其实出嚟𠮶个嘅事件嘅效果会好好多啰。咁所以既然我唔系咁清晰，成件事嘅来龙去脉，又或者我又唔系好想去八当中究竟个仔细嘅内容，或者情节系点，咁冇㖞咁咪，既然佢哋双方面都已经系处理紧，咁我作为一个旁观者，或者外人嘅话，亦都唔方便去干涉件事啰。”