杜汶泽破解阿娇语言艺术 “个个都美颜，唔通个个都想美颜咩!”
撰文： 何志衡
出版：更新：
钟欣潼(阿娇)早几日好似饮醉酒咁讲咗番说话：“个个都拍拖，唔通个个都想拍拖咩？”当日喺旁边嘅张智霖都听到呆咗！但系呢番咁高深嘅说话就俾杜汶泽破解咗喇！
阿泽喺fb贴文话：“各位街坊如果同我合照可唔可以唔用美颜apps，白X到艺妓（伎）回忆录咁，阿妈我好惊呀！个个都美颜咖啦！个个都美颜，唔通个个都想美颜咩！”明唔明？即系个个都想执靓个样，但系阿泽就唔想执到艺伎咁样样啰！
阿泽回复留言时系咁意解释咗件事，系有粉丝同佢合照之后，即场喺佢面前美图秀秀，将佢块面变白。嗱识睇一定睇留言，张栢芝就留言话：“笑到芹菜”阿泽回复：“啊天皇巨（星）你懂的”。
陈贝儿仲劲，将阿泽个样key落贺年娃娃度仲留言话：“对唔住呀我唔知原来你唔钟意萌萌哒”阿泽仲搞笑：“点解你会有我张中学毕业相咖”。
杜汶泽自己都唔执输玩埋一份，将自拍照执到白脸、V面、大眼嚟回应大家，又另外执咗张自己同古天乐嘅合照，将皮肤黑黑嘅古天乐执到接近白色，玩到好尽！