乐基儿拆解“新欢”身份 冯允谦与Fans斗快买新唱片

冯允谦、云浩影、乐基儿、陈颖欣、卫诗日前出席护肤品LA MER圣诞活动，Jay Fung、Cloud及Jill更为活动献唱，将节日气氛推至高峰！

久未香港露面嘅乐基儿表示，配合爱儿假期返港渡假，与家人欢度圣诞：“仔仔嘅礼物已经准备好，因为佢有佢嘅wish list，我就最想平安、健康，呢个系最好嘅圣诞礼物。”早前有报导指与“肌肉男”同行，更指对方为基儿“新欢”：“佢系我经理人，因为太耐冇喺香港工作，大家唔记得我身边同事啲样。（想有另一半？）依家小朋友仲细个，同埋做野都好忙，焦点未到呢个阶段。”

乐基儿一提到爱儿笑得甜思思，仲话妈妈早前越洋探孙睇表演：“佢好耐冇嚟探我哋，所以真系好开心！（仔仔有表演天份？比佢入行？）有冇表演天份就未知，因为佢仲细个，仲未识怕丑，但入唔入行就由佢自由发挥，我只想佢做个好人就得啦。”

冯允谦、云浩影呢日孖住出席动，二人卖口乖大赞产品好用，Jay Fung仲话想收护肤品做圣诞礼物：“旧时我会借咗妈咪啲护肤品用，但依家佢知我去活动，佢会问我有冇赠品，不过如果冇都会买比佢。今日我刚刚出咗唱片，真系好开心！嚟活动之前我都去咗唱片铺，自己买咗几只，嚟到见到啲Fans已经买咗，真系多谢大家支持！”提到今年颁奖礼有机会“大满贯”，他笑言奖项“唔好谂太多”，但对自己作品满意。

而Cloud就话依家专注工作，无时间谂“恋情”：“今年冇‘佳人有约’，就系约咗啲同事开Party，其实最想同工作约会！（有冇人写深情圣诞卡比你？）我谂我啲Fans会写比我。”

同场嘅陈颖欣早前与家人去澳大利亚旅行，笑言“见动物多过见人”，出席活动感紧张：“可以同屋企人一齐真系好舒服，以前因为工作错失好多时光。今次旅行食多咗，所以肥咗啲啲，但一返香港就‘肠胃炎’病足几日，即时瘦翻晒！”提到早前Kayan9896 离开“试当真”，Yanny为对方发展送祝福：“每个人发展，去到不同时刻都有唔同方向，我都很替她开心，见到佢做音乐都做得好好，希望她揾到自己喜爱嘅事发展。（到你做一姐？） 我地呢啲网台都有呢啲野咩？我地系男权至上嘅台，我时刻都为女仔争取一啲位置。”Yanny生日在即，佢就话每年都唔“大搞”Party，仲话想食鸡煲庆祝。

卫诗为活动献唱圣诞歌曲，她表示现自组公司发展，或与家姐再合作：“同家姐都有倾过，依家物色工作人员，好快会再有新歌。我同家姐由细到大都会share所有野，包括衫、裤、鞋、袜都会！（佢啲衫你啱著？）哈哈！我系好钟意佢啲衫㗎。”