专访︱钱小豪后生太搏挨坏身子 曾后脑落地失忆三日：成身唔郁得
大约半年前，钱小豪突然被发现暴瘦，令网民对其健康状况非常担心，甚至推测他是否身患绝症。今次《01娱乐》访问就请他交代一下最新健康情况，他亦畅谈了在影坛45年的经历，从年仅16岁便做主角、22岁拍《僵尸先生》一炮而红，期间辉煌过也受伤过，却在中年时遇上事业低潮，自觉已过气，上到内地只得一些四、五线反派的演出机会，到底他是如何挨过来，变到今日百毒不侵，什么都能淡然面对？
场地：莲香楼
回应最新健康状况 轻40磅反而更舒服
开始之前，当然要先讲讲大家最关心的健康状况，小豪哥说：“我健康好好！”年年验身的他半年前才检查完身体，一切正常；要说小毛病的话，就是半年前验到有青光眼、少许白内障，要滴眼药水控制眼压。至于暴瘦是什么回事？他说自己近十年八年在国内拍摄，不太想乱吃东西，习惯一日一餐，加上疫情期间隔离吃不惯那些食物，胃口就愈来愈细。小豪哥现时140几磅，他觉得肥与瘦之间，自己宁愿瘦，“如果我而家到呢个年纪，我有个大肚腩好肥，又话我唔长进、唔keep，两者去拣，我宁愿瘦。瘦啲好啲，因为我觉得瘦啲轻便啲，著衫都舒服啲，个人冇咁遴迍（音：论尽）。”
知道大家可能仍然未必信，记者再追问，毕竟他前阵子曾经剃光头，有人就揣测他是否患癌症、做化疗等等，他先为癌症辟谣：“一年前，理发师睇到我头皮里面有两挞黑印，佢话睇睇好㖞，惊啲斑里面有啲唔好嘅组织，咁咪睇吓皮肤科，医生就话‘系㖞，不如验吓稳阵。’佢话要喺𠮶个位剃一执头发，我话咁鬼肉酸，直头剃光佢啦，仲型仔！咪抽咗啲纤维走去化验啰，冇事呀，可能年纪大开始有啲色斑啫，而家色斑都冇埋啦。”接著他又再为糖尿病传闻解画：“我望住镜头讲，我冇糖尿！个个都问我，你有糖尿病？前几日剪头发，发型师话‘唔好呃我，你系咪有糖尿病？’你就糖！”记者大吉利是问句，若将来万一真的有什么疾病，小豪哥会否公开，他就觉得医学先进，无必要隐瞒病情，毕竟自己都62岁，年纪大一定有毛病。
欣然接受变老 投身直播界女粉丝多过年轻时
小豪哥年轻时可是难得地又靓仔又打得的演员，现在过了花甲之年，面上多少添了点岁月痕迹，笔者曾见到他开直播时有网民留言“豪哥老了。”对此他就表示：“老了系正常㗎啦， 60几岁如果我仲系20几30岁个样，你又话我做咗啲唔知咩喺块面𠮶度嘅啫！”他觉得自己皮肤其实还不错，自然、冇毛孔，就算有皱纹都很合理，“依家Man好多，靓仔过20几岁𠮶时。”更大爆女粉丝数目比年轻时还多了，常常在网上倾偈，又会在不同城市搞粉丝聚会，连狂蜂浪蝶都多了，“佢哋日日喺facebook嗌生嗌死，‘豪哥快啲出现啦！好挂住你呀！好爱你呀！’”
之前有报道指小豪哥与粉丝合照时非常亲匿，女方甚至紧紧拥著他，小豪哥其实很锡Fans，他解释：“一定要拥抱吓佢哋啦，唔系佢哋发烂渣。你要体谅佢哋，你唔拥抱佢哋，佢哋系会伤心，系咪好自大啊讲得？（佢哋钟意你嘛！）系真系钟意我，我理解到佢哋有啲住喺偏远地方，可能转几转车，坐公车至去到火车站，唔系高铁㖞，嚟到可能要20几30个钟头至见到我一面，你话拥唔拥抱佢好？唔系有啲会喊㗎嘛！”所以他见到粉丝时，会逐个逐个慢慢拥抱，报答对方的支持。
近年小豪哥电影产量减少，毕竟拍戏太辛苦了，又要通宵，又要黐头套，又要打，年轻时体力透支得太多，早已满身旧患，倒不如做些舒服的工作，于是他转型开直播。不开犹自可，一开才发觉自己的流量原来好犀利、好有威力，“抖音有粉丝剪我以前𠮶啲片上去，喺抖音个点击量系75亿！原来咁㗎㖞！75亿！国内都系14亿人，抖音75亿！”以往小豪哥较内敛少话，尤其细个就在片场工作，面对住大明星们，怕说错话得罪人，但在直播中要做主持，两个钟不停与嘉宾聊天，也是他从未挑战过的工作，他说自己是受细仔启发，见他2岁时已不怕生保，跟第一次见面的新朋友都主动倾偈，“我都要叫佢声德哥，点解我以前唔学吓佢呢？”所以小豪哥都愈来愈开朗健谈、圈子也多了，人缘也变好，连去街市买𩠌都著数多多。
14岁瞒家人打擂台 第一次已获奖
与小豪哥讲起入行经过，他说小时候已无心向学，坐在课室里游魂，一落堂冲去做运动，70年代武侠片盛行，他于是去学功夫，睇完《Rocky》更决定去打擂台，“14岁咋嘛，好彩𠮶时生得高大，我咪话我18岁啰。”当他打第一场的时候，当然瞒著家人，怕他们唠叨和担心，但第二场爸爸就经已来捧场了，“我有奖攞返嚟嘛！”如是者打了两年，他对武术的兴趣未停过，每星期六都去邵氏位于中环的娱乐戏院睇武侠片和动作片，有次见邵氏招龙虎武师训练班的新生，他便胆粗粗报名，顺理成章展开了武打演员之路，打开了电影大门，“佢唔知要上半年定上几个月，我上咗两个月，可能个校长或者导师觉得我有啲潜质，跟住就话张彻大导演落嚟拣蟀，就拣咗我同几个人。一上去第二日就试造型，佢就话‘听日上嚟拍戏啦，唔使去训练班！’咁样㖞， 16岁都未够㖞，你咁睇得起我！”
与黄秋生童年时比武切磋 打擂台前获对方送漫画鼓励
张彻是当时邵氏的大导演，也是小豪哥的恩师、伯乐，没多久报章已用“张彻新契仔”称呼他，就连“钱小豪”这个名都是恩师为他改的，“我叫钱嘉华呀嘛，佢改咗我叫钱小豪，初初唔习惯㗎，仲有啲师兄弟笑我，话钱小豪倒转读，‘好少钱’，哗。不过而家钟意呢个名，用咗40几年，无论喺国内同香港都叫我小豪哥，好亲切。”讲起“钱嘉华”这个名字，前阵子黄秋生出Post关心小豪哥时，也以“嘉华兄弟”称呼他，惊揭两人原来识于微时，“我哋细个同一间学校，又同一个门派，秋生又系武痴嚟，成日要揾我比武，结果我唔话畀你听。（即系你又赢啦？）唔好讲！唔准讲！”说到这里，小豪哥笑到眼泪水都飙。
小豪哥自觉与黄秋生有缘，除了武术上的切磋，秋生哥还会跟他看书，“佢同我一样屋企好多书，但系佢高深啲。佢系一个学者嚟，我跟佢睇吓书啰，历史、哲学，咩都睇。”小豪哥更讲出一件年少时发生的窝心事：“佢好有心，𠮶时知我打擂台，𠮶时我哋返八点，同一间学校，佢晨早六点几七点嚟到我屋企门口拍我门，佢话‘喂，有本漫画讲打擂台泰拳嘅，拎去睇，睇吓有冇用。’咁样㖞，好笑。”大概这便是秋生关心人的方式，尽管后来大家入行后没机会合作，戏路也不同，但偶然都有小酌一番，对于秋生早前在贴文中讲到“可能你睇唔到我嘅祝福，但系希望你一切安好，身体健康。”小豪哥大笑说：“𠮶篇文！我谂就系啲传媒话到我就嚟咩……佢即刻话‘希望见返你啦’，我觉得佢系咁嘅心态。”
16岁获张彻赏识入行 豁免读训练班即做男主角
小豪哥都同意自己有少年运，16岁未够就有机会做主角，张彻在训练班60几人不选，偏偏选中他，“有啲人穷大半生，都未有一个主位做过，我竟然16岁未够嘅小朋友，就可以有呢个（机会）。”问他觉得自己是否有什么过人之处，他笑说：“点知啫，靓仔啩。张彻恩师好兴一套戏有五个主角演员，即系好似以前狄龙、姜大卫、陈观泰、傅声咁样几个拍一部戏，我咪其中一个啰。”虽然成名来得快，不过他不敢轻率，在片场上面对一个个大师兄、大师姐，小豪只希望自己成为更有实力的人，不想被看扁，于是他收工后去学自由体操、翻腾、跳弹床，把习得的技艺融合在电影的功夫打法，成功创出自己的风格。
年轻揾命搏上位 满身旧患曾失忆及全身冇知觉
那个年代竞争大，要揾命搏才有机会上位，所以他从不偷懒，永远亲身上阵，但同样地，也常常发生意外或受伤。讲到最惊险一次，是他拍摄一场碌楼梯戏，剧情讲述他心口被人踢了一脚，倒后滚下石楼梯，他头部猛烈受撞击。小豪哥说：“咪失忆咗三日啰，撞到个后脑，成身唔郁得！撼到个后脑，轰一声，下半身唔郁得㖞，我以为会唔会断咗神经线呢？你知有啲撞到颈椎会瘫痪㗎嘛，想郁下只手又郁唔到，跟住就晕咗。”电视剧常常有演员昏迷后在病床上醒来，问：“呢度边度嚟㗎？”原来这个情节，也确确实实发生过在小豪哥身上，他再次恢复意识，已是一天之后的事，睁开眼睛见自己身处医院，他第一个想法是：“今日系拍边场戏？”当时女友说出实情，指他已昏迷一整天，他还说：“你唔好呃我啦。”至后来记忆终于慢慢、慢慢回复过来，他才发现自己“断咗片”。
洪金宝邀拍《僵尸先生》 成史上第一人令嘉禾邵氏合作
小豪哥最大的代表作当然必数《僵尸先生》，那年洪金宝大哥想开拓新戏路拍《褔星》系列，又不想拍开鬼片的手足冇工开，便邀他这位新人去嘉禾拍僵尸片，原本小豪哥是打定输数的，最主要当时他跟邵氏有合约，而邵氏和嘉禾是敌对的，他心想邵定一定不会放人，“洪大哥话‘好呀，你试吓倾吓先啦。’我咪上去邵氏高层度问吓佢哋啰，点知我一问，高层话：‘好吖，你过去好呀，因为邵氏电影公司呢排开戏唔系好多，但系你个个月都出粮㗎啵，不如咁啦，你停薪，去到嘉禾，你拍几多个月，咪喺邵氏合约里面扣几多个月啰。’咁㖞！咁样过到去㖞！我觉得电影历史要写呢段落去，邵氏同嘉禾合作，就系为咗钱小豪！”
被定型感困扰 《张三丰》转演反派大受欢迎
不过小豪哥却不认为《僵尸先生》是带给他最多的一套作品，例如：《大头绿衣斗僵尸》以及国内、台湾的电视剧都是他的代表作，而其中一套，是他做反派的《太极张三丰》。他当时觉得僵尸系列已经式微，自己已厌倦了，决定离开香港拍其他埠片，“《太极张三丰》呢个反派我好乐意去演，出嚟而家仲有个金句：‘我命由我不由天！’”转型成功，他自然更不想再拍僵尸片，2013年麦浚龙（Juno）找他拍《僵尸》，他起初也是拒绝的，“第一个感觉系，如果系旧瓶新装，仲系拍返以前𠮶啲就唔好重蹈覆辙啦。我咁辛苦去改形象，反派都做得咁成功，你又叫我拍返以前𠮶啲？系咪先？佢话唔系呀，我拍你半自传，系将你以前经历过嘅𠮶啲嘢拍出嚟，全部同以前唔同嘅，咦，咁我有兴趣㖞！”
同期拍档已进军荷李活 成麦浚龙说服拍《僵尸》因由
Juno游说小豪哥接戏期间，曾问他：“你甘唔甘心㗎？”与他合作《原振侠与卫斯理》的周润发、张曼玉；《太极张三丰》的李连杰、杨紫琼，全都去了荷里活，Juno问：“你甘唔甘心？有啲同期𠮶啲都去晒荷里活。”小豪哥不讳言自己曾经执著过痛苦过，但后来已放得很低，并没有什么甘不甘心，即使有任何挫折，他最多也是记低那种感受，放在心底的“笼柜”里，锁起来，到拍戏有需要时才翻出来，煞科后又锁起，“可能Juno当时想再启发我喺戏里面个心态，有时命运嘅嘢唔系话我要得到就可以得到㗎嘛，但系我嘅财富就系我经历，呢啲咪我经历，我有信心演到你部戏咪得啰。”
曾自觉过气只得四五线反派角色演出 为儿子顶硬上
小豪哥24岁已做业主，用80万买下太古城千呎单位，但在《僵尸》中的钱小豪，却是一个回到屋邨生活的过气明星，不再辉煌，问现实中他可曾觉得自己过气，他直言：“有，应该系2003年𠮶时喺国内做导演，拍咗两年戏，唔舍得离开屋企，因为想睇住个仔长大，好啦，转返做演员，唔知系2005定06年，开始出嚟做返演员，国内都知我叫钱小豪，但系佢就话‘你演员好似冇乜作品出㗎喇㖞。’咁就用你个名做吓反派，当系一个卡士啰，喺𠮶啲好渣𠮶啲电视剧做个反派，总之咩衰嘢都系你做晒啦，四、五线，可有可无𠮶啲。”由昔日少年得志、红遍亚洲的卖座主角，到中年却坐冷板櫈被如此“羞辱”，要演“萝卜头”，但他最终还是接下了这些角色，“因为我要做演员养个仔，𠮶阵时个仔仲细。”
被问要如何调整心态，接受自己已从主角变成可有可无的角色，他认为：“好多人系接受唔到嘅，接唔接受系睇你自己咋嘛，唔好俾呢种常态影响自己嘅心态呀嘛。”小豪哥那时跟自己说：“唔紧要，我做得好睇就得㗎喇，我当一个职业啫，当锻炼演技，咁渣嘅角色我都演得好，你唔好畀啲好角色我呀！我又嚟㗎喇！终于咪又等到Juno呢个角色啰，咪又再嚟过啰，系咪呀？因为我有经历呀嘛，我有故事吖嘛，所以我演绎得好好。”
《僵尸》里小豪哥确实演得好，同片的鲍起静夺得了影后，他却连入围都没有，不少人替他不值，他一样淡然面对得失：“攞唔攞奖，有好多系天时地利人和啦，或者评审觉得你都系打仔嚟嘅啫，唔会投你一票，唔紧要，大家见仁见智。我又冇觉得可惜，惠英红话唔抵呀嘛，‘觉得好可惜呀，你演得咁好！’演得好咁又点啫？一定要有提名㗎咩？冇所谓㗎，而家喺网络平台嘅世界，好多人睇完都话我演得好，就已经系无名影帝啦！”他亦寄语其他演员不要常常郁结，“‘点解我攞唔到奖？点解我冇提名？’咁系你影响你自己心路历程，演员唔需要呢样嘢。”