Edan亲自回应床哥抽水事件　姜涛：唔系一句讲笑就冇事

JFYT嘅床哥日前直播时，为叱咤五强投票拉票而明寸MIRROR成员Edan于十强投票期间，于台湾蜜会林明祯，姜涛其后于相关影片下留言“冇品”。

MIRROR今日出席《CHILL เก่ง Music Festival》，Edan同姜涛亦有就此事作回应。Edan表示姜涛留言嘅举动是想保护自己，而他本身亦有留意JFYT，觉得他们有风格有特色。“床哥俾我印象系好聪明，所以我相信佢哋讲嘢不嬲都系咁，唔系有恶意，唔系想伤害或者特登咁做，可能都系想开下玩笑，但有时开玩笑会无意中影响到其他人、过咗火，呢啲我可以理解，但我觉得最紧要都系互相尊重，冇必要引起不必要嘅纷争，大家都系成年人，成熟嘅。”Edan又指YT昨晚有致电，并表示会了解事件。Edan又谓唔想双方变对立关系，而他亦强调工作永远是第一位，每次都是百分百认真。“都知爵屎呢排辛苦，我知道佢哋好锡我，付出好多，我都好感动，所以嚟紧我都系用作品去报答佢哋。”

姜涛表示尊重每一个音乐单位、作品，相关留言针对事件而发表，他理解临近年尾每个歌手都会为自己作品拉票，亦尊重用唔同方法拉票。“睇到直播时会觉得系咪要用呢个方法去争取票数？呢件事系值得讨论。身为公众人物，一言一行都好有份量。佢哋都系5强之一，将心比己多啲，因为每一句说话都可能有自己嘅追随者效彷，所以讲每一句说话都要思考过，唔系一句讲笑就冇事。”姜涛又指回应是为了唔想再想有下次，更强调自己唔认同为拉票而作出此举。而对于床哥之后嘅道歉限动，姜涛表示尊重但唔作回应。