无线不敌网民腰斩《战场上》　陈志云不认同做法：将招牌涂上污点

由黎芷珊主持的TVB台庆节目《战场上》，随摄制队走访乌克兰遭战火洗礼的大城小镇，悼念在战争中无辜丧生的普通市民。可是节目播出后引起外界争议，在facebook群组内有多名网民发文表不满，指节目单方面拍摄乌克兰情况而未有提及俄罗斯一方，质疑节目偏颇。结果原定10集的《战场上》只播出两集便腰斩。早前曾志伟出席庆台时就腰斩《战场上》作出回应：“要注重社会反应。”

前TVB高层陈志云（Stephen）今日（25/11）现身中环出席时装骚，就事件接受《香港01》访问时表示：“我就冇睇过𠮶个节目，因为佢只系播咗两集，而我又真系唔知佢下架嘅原因。（网民觉得偏颇！）我觉得唔应该，我谂唔净系咁简单，佢一定系有啲问题，而制作组都要制作费，如果个节目下架唔再播，个笔钱系会冇咗，咁都系其次，而人哋系会问点解要下架，咁变咗对观众欠咗解释同交代。而我估乌克兰同俄罗斯呢场战争可能呢个太敏感，又或者可能地缘政治太敏感啩。但我又调返转嚟睇，喺一个战场上面，报道受到战争嘅苦难，其实系冇立场，我唔系话边边啱同唔啱，系讲紧个实况，如果咁样都要下架呢，咁变咗好多嘢就要下架，我哋总唔能够有一圈嘅网民咁闹，而你成个电视台就话我哋会下架。同埋以前洪永城都有主持类似过呢啲节目，而𠮶个又冇问题，同埋𠮶个导演监制都系同一个人嚟，所以我就觉得系非常之可惜啰，但点都好千祈唔好将个责任推落黎芷珊身上。”

提到早前曾志伟出席庆台时就腰斩《战场上》都有作出回应指“要注重社会反应。”陈志云笑言：“我好尊重志伟哥，我谂佢都系要谂个说法说出嚟啦，但呢个说法说唔说服到人我就唔知，但说服唔到我。因为TVB有个‘卖桥会’，以前就由我主持，咁而家系边个去主持呢？𠮶条桥最终过到，咪就系喺𠮶个人度㖞，唔通𠮶阵时佢哋冇谂到？同埋你话要听人哋嘅声音，应该系‘有则改之 ，无则加勉’，你觉得自己冇问题，就唔会因为人哋嘅声音去改动，你改动得，就即系代表自己有问题，咁你就应该话俾我知问题喺边。同埋呢个又唔系新闻节目，又唔系纪录片性质，其实佢系娱乐资讯节目嚟。其实佢而家咁样下架，系将自己嘅招牌，涂上咗一个污点上去啰。如果佢真系因政治原因下架嘅话，就讲俾大家听啰，但我就唔相信系啰，我唔相信《中联办》，亦唔会相信中央会话呢个节目，亦唔会睇到咁细。