独家｜戴耀明冇剧拍做侍应 踎地洗碗起身见头晕：要啲时间习惯

52岁TVB有名的绿叶戴耀明曾经拍过无数的经典电视剧，今年更完成新剧《刑侦12》的拍摄工作。最近有消息指戴耀明于“饮食界富二代”张本立（Billy哥）黄大仙的茶记开工，日前《香港01》 独家直击戴耀明开工情况，更捕捉他在茶记现场为食客落单、抹台、洗碗，以及倒垃圾等。戴耀明接受《香港01》访问表示：“唔系转咗行，因为同Billy哥讲开做演员都唔系好稳阵，近排又得闲未剧开，咁佢就话不如你去实习吓（餐饮业）啦！如果冇嘢捞就开间餐厅，就学习冲咖啡同埋奶茶。”

做侍应要服侍食客觉得尴尬

谈及Billy哥是否曾经怀疑“你系玩玩吓？”，他说：“我系认真㗎！佢初头真系X(讲粗口），对啲员工好认真咁样教，当自己系一个演员去演侍应，我同Billy哥讲话有咩就直接同我讲得啦！唔需要特别客气。”至于现时的工作情况，他说：“我都开咗工两个礼拜，返工时间可以好长，朝头早五点几要起身，佢哋有两个更表，返夜晚黑就要做到12点几。”被问到最难适应的一点，他坦言：“服侍啲食客，好尴尬，啲客问我系咪拍紧戏，演员𠮶个心理关口，好似做开演员做第二个职业做侍应，要拎碟叉烧饭畀食客感觉好唔真实，我自己都好唔惯，通常啲食客问到我就会笑骑骑，话帮朋友顶住一两日。”

自爆每日收入得三百至四百蚊

谈及是否要做侍应帮补家计，他直言：“近排又比较少嘢做，做演员系唔知道，可能下一年冇嘢做，或者签好多年约，如果冇嘢做嘅时候都想揾一门手艺，做第二样嘢都可以生存到。”至于工作的薪酬，他透露：“我冇乜出人工嘅，以我所知每日都可能系三百至四百蚊人工，一个礼拜就通常有一日假放，一个月起码返28日，一万几蚊一个月。”

踎低洗碗起身觉得天旋地转

至于要否亲自洗碗，他说：“都要㗎！通常我要戴手套洗嘅，个过程就比较热啲，个环境都好狭窄，之前30几度嘅时候都好难适应，有啲炉喺侧边，我试过踎喺度洗，一起身就觉得天旋地转。”讲到是否有向Billy哥撒娇提出休息的要求，他坦言：“都有嘅，大家都系friend老友，最主要系要去感受过呢个过程先会体会得到，就系做侍应要企10几个钟，每日就要行嚟行去同埋拎嘢体力劳动，初头几日就好似我哋拍戏咁，但系拍戏好多时冇镜头我哋就坐喺度休息，净系食饭15分钟可以休息，所以体力上都几吃力，我问咗好多人成日都要行嚟行去会有职业病，只脚会有静脉曲张。”

送外卖被人以为拍《东张西望》

至于是否会出现腰酸骨痛的情况，他表示：“都会㗎，始终我年纪都唔系细。”被问到是否要送外卖，他表示：“有阵时都要嘅，因为实在太好生意，晏昼饭或者晚市因为伙计唔多，伙计叫我帮帮手，送外卖都好搞笑，人哋以为系咪拍紧《东张西望》，我话真系送外卖唔系拍戏，最大嘅关系就系市民点睇你？”

难顶食客唔冲厕所

提到过去有否收到贴士，他分享：“有一次送外卖$53，就俾咗$60我，之后同我讲戴先生唔使，好搞笑。”谈及是否需要亲身上阵洗厕所，他坦言：“咁又唔使嘅，但系譬如有阵时我哋去厕所，啲食客唔冲厕所，跟住成个地下周围都系，就算系员工都会唔舒服，自己有阵时忍唔住揾啲漂白水帮手拖。（是否试过碰到客人的粪便或尿渍）咁又未试过，但有阵时啲客人大便，好似免治牛肉饭，都有曾经试过一次嘅经验，要帮佢冲厕所，平时我哋入到公厕见到呢种环境都会走。”

做侍应辛苦过TVB拍戏?

被问到做侍应是否会辛苦过在TVB拍戏，他表示：“睇你点睇？做演员好多时都唔使湿手湿脚，享受个角色，做完就走人，如果做一个侍应同埋饮食业嘅员工，所以好多嘢就需要好顾及，最紧要系体力劳动，又要点样抹台同埋照顾啲食客，侍应兼顾嘅嘢太多，比起做演员兼顾太多嘢。”

透露搭港铁返工

被问到是否有计划与Billy哥合资经营餐厅，他笑言：“有讲笑咁讲，话俾钱入吓股份，我做呢行先问清楚原来灯油火蜡要咁贵，近排好多食肆倒闭，我终于知道点解因为实在太唔容易做。”谈及上班的交通情况，他表示：“有阵时忍唔住我都系搭的士，但通常都系搭港铁，因为行去港铁好近，收嘢嘅时候都仲有港铁可以搭。”

有望与Billy哥一齐做DJ

谈及与Billy哥最近一起拍摄影片，他表示：“我哋就系贪得意去玩，点知有个啤酒嘅品牌就叫我哋去拍10条8条片，又有得玩又有钱收，两个阿叔就变咗KOL，临老先做KOL。”至于工作大计，他笑说：“我好想同Billy哥一齐做DJ，或者问吓我哋以前嘅好同事马浚伟先生喺新城度做，我哋有阵时讲笑咁，讲不如去见马浚伟倾吓去做DJ。”