关宝慧恨结婚准备玩交友apps　一提绯闻对象黄日华即失笑

“鬼后”关宝慧昨晚现身电视城为《直播灵接触》任嘉宾，她接受访问时笑言已准备好同梁思浩斗“嘴”，又指梁思浩虽然成日咒自己，但都多谢对方，原因系唔想太长命。“头先我哋讲佢前世系女人，我前世系男人，咁应该系会结婚嘅。（几时结？）好想，点都要摆一次酒，7月14搞大佢。我其实准备结婚廿几年，但无人同我结咋嘛。”

提到感情事，关宝慧指朋友由落力到放弃，梁思浩即提议他揾江美仪。“𠮶日有人WhatsApp我，话佢都玩交友app，我其实成日都想揾征婚公司，我其实近乎放弃㗎啦。所以今集讲前世今生好啱我，因为我系相信前世系有啲嘢，影响我今世系咁，真系㗎，你睇下有啲人结到婚，有啲人结唔到。（会唔会自己一个更开心？）唔会！唔会！紧系想有人照顾。”问到传足几年绯闻嘅黄日华时，关宝慧即时失笑，又指已否认多次。“有次我去买衫，店员话‘人逢喜事，著咩衫都靓’我问佢咩意思，我未生日，佢话‘你拍紧拖嘛，就嚟结婚啦’，我心谂我自己都唔知，我每次出街都系咁，讲咗3年。（会唔会令追求者却步？）我深信如果真系钟意我，点都会揾到我。”

关宝慧透露之后会拍微电影以及舞台剧，问到有无兴趣拍剧，她表示好耐之前其实有倾过，但最后无成事，问到心水男主角的话，她即表示：“一定唔会拣梁思浩。黎耀祥，我哋系对方各自合作最多嘅拍档，近年真系少咗机会同佢合作。”