新精武门｜夏志珍神隐31年终现身：喺街有人叫我吹萧萍

90年女星夏志珍曾参演过不少港产电影《东方秃鹰》、《黑海霸王花》、《女子监狱》、《皇家飞凤》、《卿本佳人》、《江湖最后一个大佬》及艳情片《聊斋艳谭》等。而最令人留下深刻印象，必定是周星驰电影《新精武门1991》中“吹箫萍”一角，当中搞笑本色，亦成为网民的集体回忆。

神隐31年的夏志珍今晚（11/11）现身电视城出席TVB Plus《直播灵接触》 直播节目。她接受《香港01》访问时表示：“其实吹箫萍呢个名真系深入民心，试过喺街上有人见到我都叫我吹箫萍，我都会话你好。（而家介唔介意啲人咁叫你？）我唔介意。可能我个样好凶恶，变咗拍亲都系黑社会，又或者大家姐同埋演差人，但其实我份人系好好笑，根本就唔系恶人嚟嘅。（当年同周星驰拍𠮶场戏，事前有冇排过？）以前边度有呀，一去到就叫你演吹箫萍，我讲呢个对白，咁你就消化吓啦，大家对一阵就嚟。”

被问到周星驰当时演出收唔货？夏志珍表示：“佢好快就收货啦，不过喺拍嘅时候，我就成日都忍唔到笑，因为每次要我讲攞支箫出嚟，我就已经系咁笑频频NG，自己系顶唔住系咁笑。（而家有冇戏瘾？）我而家懒呀，因为人唔想做嘢，加上又要记对白，我惊记唔到会好辛苦。（为何93年之后淡出影圈？）因为觉得角色唔啱做咪唔做，唔似以前要为咗生活，自己唔钟意嘅角色都要去做，例如要我去打，要我去挞落地，每次拍完我都要返去捽药酒，每次返到屋企，3、4支药酒喺度等我，当时系冇办法为咗生活。（有冇旧患？）有呀，我条腰骨系歪，系伸唔直。（𠮶阵时系唔想拍打戏，想拍喜剧？）系呀。𠮶阵时心谂点解唔揾我拍笑片，都明白自己个样凶恶，唔系善良嘅样，都明无办法。”