肥妈忆述亡夫泪如雨下　黑妹受姐夫临终所托：佢哋仍好爱对方

肥妈（Maria Cordero）与黑妹李丽霞将会在12月于伊利沙伯体育馆举行“妈妹笑住唱 Part 2”演唱会，日前接受Hoytv 主播俞咏文（Angela）访问畅谈多年姊妹情。

肥妈忆述很多年前黑妹打电话给自己邀约合作：“我当时都未识佢，佢打电话嚟话佢有一场骚想我唱，但系畀唔到我价钱，当时我见到佢一个女人带住个女，咁有胆量，我二话不说就话好，之后就做咗好朋友喇! 之后到我老公叫我打哥尔夫球，我觉得好闷，死都唔肯打，跟住有一次同黑妹去登台，佢叫我唔使理咁多，攞支棍殴落个波度，真系打到㖞！ 我老公喺现场拍晒手掌，由果下开始，我先开始打波，所以我老公锡到佢㶶！ 之后我就经常同老公打波，尤其系佢离开前𠮶三年，所以黑妹系唯一一个叫得到我打波嘅人！ ”

讲到两人首次合作的演唱会，肥妈说是天注定：“当时个档期本来系Joe Junior开演唱会，点知阿Joe突然心脏病入咗医院，黑妹就打畀我希望我同几个人夹份做咗个骚，但当时我啱啱做完红馆演唱会，所以拒绝咗，点知我老公一知道，就叫我一定要帮黑妹，点可以唔帮佢㗎！所以就有咗第一次嘅《黑妈妈演唱会》，我想讲嘅系，如果我老公走咗果几年，冇黑妹姐陪住我嘅话，我已经癫咗喇！”

黑妹亦表示和肥妈姊妹情深的原因，都是因为一个“义”字：“喺疫情期间冇嘢做，就返咗去内地，点知唔够半年，肥妈就不断call我，叫我返嚟香港，我话落到嚟都冇嘢做，冇工开，佢就话我包你有工开，仲包你红添呀! ”肥妈续说时更泪如雨下：“佢一返到落嚟，我就即刻开咗个网上节目一齐做，做节目可以令我平静，照顾老公𠮶几年，冇压力就假嘅！ 样样我都要亲力亲为，佢二百几磅，我日日抱佢去厕所，去冲凉，佢一离开，我就坐足两个月轮椅，完全行唔到路，冇咗老公𠮶段日子，黑妹就成日陪住我，𠮶一关真系好难挨…”

肥妈老公临终前亦有交托黑妹睇住老婆：“当时喺泰国打波，肥妈老公同我讲，知道自己时日无多，叫我记住睇住佢，当时我都喊咗出嚟！而家转眼间都过咗好多年，佢哋仍然好爱对方，有冇人痴线到四年结一次婚㗎！ 仲要有造型添！ 你话呢件事系咪好浪漫先！ ”