【超时空男臣】盖世宝离开儿童组变孤儿　合约剩半年：有心理准备

《超时空男臣》首周平均收视24.5点，第一集试过最高27点，成绩唔错，对于很多观众来说，剧中最熟悉、最亲切的不是萧正楠、田蕊妮，而是剧中饰演姑姐的盖世宝，由《闪电传真机》《至net小人类》到《放学ICU》，盖世宝当儿童节目主持18年，儿歌《小司机Noddy》、《魔法小美穗》陪伴过不少小朋友成长，她是继谭玉瑛姐姐后，最耐的主持人，但2014年儿童组改革，盖世宝由儿童组转去剧集组，重新来过，以前每日稳定有工开，爆骚是基本，但现在连开工都随时不足。

盖世宝今日出席《超时空男臣》活动，更担任司仪，虽然少做了主持，但今日在活动上挥洒自如，她接受《香港01》访问时说：“我一直有心理准备，唔会一世做儿童节目，但最震憾系全部人都解散，𠮶下感觉大啲，系㗎，人哋对我做儿童节目主持印象太深，当时根本就唔敢用我，好多人都唔知我由儿童组出咗嚟，但好彩出嚟嘅时候，监制潘嘉德俾机会我，我同佢讲：‘我出咗嚟，有冇嘢可以俾我参与下呀？’跟住佢安排我拍《拆局专家》，我好感激佢，之后有监制叶镇辉、黄伟声都有用我，我叫做吊到命啰。”

儿童节目中的盖世宝，口齿伶俐、唱儿歌同小朋友玩、完全冇难度，你会觉得她是主动的人，但她其实相当被动，即使她需要主动才可以在剧集组生存，盖世宝都选择被动，她说：“可能性格决定命运，大家见我做司仪好active，其实我好被动，唔识social，尤其敲监制房门入去倾几句，我唔系介意，我自己都觉得唔舒服，‘Hi监制，我系盖世宝。’下一句我都唔知讲乜喇，‘得闲多多关照？’定系讲‘可唔可以用下我？’人哋都唔舒服啦。我好支持人哋咁做，我知或者有回报，敲门未必有机会，但唔敲就一定冇，我好明呢啲道理，但我真系唔识做，呢个系我个人问题。其实我都敲过㗎，有次周志康陪我，𠮶次大家咁啱喺７楼（制作大楼）攞剧本，佢叫我敲下门啦，佢话呢啲真系要做㗎，𠮶次我介绍下自己，但个监制冇咩反应，哈哈……其实我乜角色都唔介意，今次《超》剧角色好好，起码有个名字，有时角色系同事A、B、我都唔介意，只不过系一个工作，最紧要有人揾我，我有工开。”

适者生存，尤其在大机构工作，盖世宝不求上位，只求有工开，但原来这个愿望要实现都不容易，她说：“或者我豁出去多啲敲门，可能会多啲收入呢，但我冇行呢步，咁我咪要承受呢个结果，因为我明白，所以平衡到自己心态，人人都有唔开心㗎啦，每个人都有烦恼，唯有自己去谂办法啰，自己唔好谂到咁差，好多人喺无线都有机会赚人仔，可能就系喺电视见过你，或者讲唔出你𠮶名，但就系认得你，因为有电视剧，但我喺电视剧就系唔稳定，所以冇人揾过我返去赚人仔，讲真，大人真系可以唔睇儿童节目㗎，你做咗几多年都可以冇人识，拍剧始终入屋，你就算睇过套剧，再喺街见到我，一时之间你都未必认得我啦。”

盖世宝人生最青春的时间奉献了给儿童节目，现在在剧集组重新来过，她被动性格亦担心自己前途，她说：“剩返半年约，其实有定心理准备，我唔知公司签唔签我，但系….我睇唔到前景呀，我有心理准备公司唔再签我，可能佢哋见到我呢几年都系咁。我唔会心淡，好多人都系咁㗎啦，由儿童主持到而家重新嚟过，我冇难过，因为预咗，形式系唔同儿童组，间唔中有一两句对白，睇自己心情点tune啦，但我要嘅系骚，我要工作先至有骚还，我唔可以拣工作，我冇乜人用，唔通仲去拣咩？我而家签紧一年五十几个骚，但我而家得几个咋。”