温拿巡唱连环跌倒 陈友笑称“真系挞成一块”幸无受伤

温拿早前喺广州开骚时，钟镇涛不慎在台上跌倒，连带想扶佢起身嘅陈友同叶智强连环跌。陈友今日同黎瑞恩齐为音乐剧《娱乐圈夫人》进行彩排，提到连环跌事件，陈友都话入行咁耐，未试过台上发生咁嘅意外，但睇片都觉得好笑，仲话今次真系“挞成一块”。

陈友指自己平时有做运动，加上骨头够硬，所以无受伤。“当下最担心会影响舞台剧，小恩子一嚟就问我有无事。每朝都会行山，上上落落都当运动。（落地唔伤，扶起阿B最伤？）我同佢绕手，佢滑住咁落，之后放软晒手脚，强哥跟住朗拿度咁铲埋嚟。啲朋友打嚟问候系担心，但都话睇片忍唔住笑。”陈友表示聚人已经睇医生检查并证实无受伤，又笑称以后要同强哥保持距离。“真系唔关阿B事，真系有油又有水。（你哋跌倒都继续唱，好尊业。）the show must go on，我瞓喺地望住阿伦，佢仲继续唱，个样系‘仲唔起身？’以前跣脚都试过，但未试过跌成咁。”

陈友同黎瑞恩嘅音乐剧将在12月举行，今日第二次进行彩排，陈友不时忘词，他笑言会用一个月恶补，而之前话好大压力嘅黎瑞恩，表示已经放松不少。