专访｜谭耀文当年入TVB月薪三千　穷到忍痛卖走最爱钱七改搭城巴

谭耀文18、9岁入行，30岁凭《野兽刑警》夺得金像奖“最佳男配角”，同年《纵横四海》爆红，他成为观众认同的实力派演员，片酬一下子由4000升到40万，足足升价百倍，至今仍机会不断。他自言“98年、99年开始，我已经拍戏好顺利，𠮶几部作品带到我冲出咗香港，去到其他地区。𠮶几年由冇唱歌到打好演戏嘅基础，改变自己嘅灵魂、气质，有少少破釜沉舟嘅感觉。”
然而，在《野兽刑警》之前，他有过一段9个月的低潮期，零工作、不敢见人、要问朋友借钱等等，演技或多或少正由人生经历而成，就连陈嘉上导演都说过，睇准他当时有团火要爆，于是找他饰演“揿钉华”。
场地：鹅颈桥四季火锅

谭耀文一心要做歌手而入行，出过几只碟，但因为一些原因、一道伤痕，他与华星合作4年便没有再续约，当时十分徬徨，不断反思到底自己还应否继续唱歌，性格是否不适合做歌手等等，“我唔识得揾啲有利自己嘅人可以帮自己，有人话‘开口啦！’，但呢啲咁嗲嘅嘢我唔识，所以我净系好简单，知道自己钟意做啲乜嘢，边啲唔钟意，以前好多时夜晚做完嘢会一大班人去玩，我就麻麻哋嘅，我钟意静啲嘅，所以演戏啱我啦。”做歌手除了上台表演外，牵涉太多不可控因素，演戏相对较易一个人控制、揣摩，于是他没多久就加入了TVB做包薪艺员，旋即担正古装剧《寻龙剑侠赖布衣》男主角。

TVB月薪三千不够生活　忍痛卖走最爱钱七改搭城巴

有了新方向，似乎光明大道即将开始，不过原来即使他已是主角，但当时人工不高，月薪仅三千，可说是相当紧绌，“𠮶时包薪嘅，几年合约，每年有计咗几多个Show，里面每个Show呢个Artist有几多钱，计咗个Show钱出嚟，计咗你个年薪，每个月用月薪出粮畀你，打工咁样。好似三千几蚊啰𠮶阵时，92年至97七年，好掹掹紧。”不知道谭耀文信不信星座，但他坦言就算穷都要浪漫，似乎很符合他双鱼座的特质；他说自己当时再穷，都买了架“钱七”，“穷到𠮶阵时连CD机都冇，就系一架好怀旧嘅钱七。呢架钱七就系李成昌，昌哥卖畀我嘅，阿昌哥，好多谢！𠮶时佢好照顾后生仔，佢话‘呢架车我谂住唔要喇，我话几正㖞呢架车，几Classic㖞。”

谭耀文过往做歌手或顺境时，不是未揸过靓车，到入TVB后收入不如前，他不讳言是“跌咗落嚟”，但比起之前揸靓车，这部用5千元买回来的钱七，意义远不止代步，而是承载着、纪念着那一段奋斗岁月的回忆，是安慰着他的一个伙伴。谭耀文驾着钱七、听住古典乐驶往TVB开工的岁月，反而是另一个他觉得很美好的世界。他说：“我觉得好浪漫，听古典音乐，因为𠮶个旧嘅收音机系特别收到港台Classical（古典乐）𠮶个台，收得特别清，其他台都收得唔清！咁我就喺𠮶度听，我一听，好平和。𠮶时94、95年开始钟意咗Classical，我发梦都冇谂过自己可以接受Classical。”车厢内的古典乐不断提醒谭耀文，在单打独斗拼搏的日子，都要记得慢活，“我觉得𠮶段时间系……好宁静地，又安慰自己喺度奋斗紧咁。”

《拼命三郎》中，过气大佬谭耀文即使生活再潦倒，都死守住时针已不再跳的旧手表，哪怕把它卖掉可以即时兑现到6位数现金救急，但谭耀文坚持不卖，因为它象征着自己昔日的光辉岁月。不过拍戏终归是拍戏，再浪漫的人，现实中还是要开饭，问谭耀文那辆钱七还在吗？他淡淡然说：“好快就顶唔住喇，好快油钱又贵、又挨唔住，跟住我就搭城巴。”香港地车位太贵了，没多久他已用平价把车卖走，后来的片段他已没太大记忆，“通常最唔开心嘅嘢又唔记得咗，但系𠮶段时光好美好。”

曾经历9个月冇工开低潮期要借钱　自卑不敢见父母

大约97年，谭耀文再次选择不续约，他离开了TVB，虽然笑笑表示自己份人多心，后来再透露真正让他毅然离巢的原因，“当时我系见到一个Scene，我忍受唔到，我唔想留喺度。唔关个台事，有一个Scene，我觉得咁样唔系拍戏，咁我就觉得⋯⋯咁微细嘅嘢畀我睇到，令我觉得唔系我想追求嘅嘢。”谭耀文自小醉心电影，朋友带他睇《教父》、法国片、意大利片，使他被艺术电影触动到，但电视台的拍剧方式较为“流水作业”，他虽然理解，却想试试再转去另一领域碰碰运气。换做今日的语言，他当时的决定跟“裸辞”没分别，然而机会不是说有就有，他一等，便是九个月，“𠮶九个月真系惨，真系想揾一蚊都难呀𠮶时！”

“30岁”对很多人都说都是一个重要关口，似乎不得不闯出一番成就，偏偏当时28岁的他突然零收入，面对未知及迷惘的前景，又不肯定这段低潮何时结束，曾有着歌星光环的他顿时被自卑感笼罩，“好自卑啦，好犹豫、好怀疑自己，又唔敢见父母，好似大食懒咁样日日喺屋企，自己畀自己压力，其实父母都冇嘢，但系我自己尊严好高。我因为男人啦，我觉得咁样唔得啵，就嚟30岁喇㖞。”讲到当时是如何挨过，他直言：“都有问朋友借钱㗎，同埋我妈咪有病，我都冇钱，我都问朋友借，之后揾到钱咪还返啰，系𠮶次啫。”

终获邀拍《野兽刑警》　陈嘉上睇准有团火准备爆

如守株待兔般等、等、等……九个月后，一通电话终于迎来曙光，来电者是《野兽刑警》陈嘉上的副导演，谭耀文形容：“一天都光晒！”事实证明陈嘉上冇睇错人，“揿钉华”一角为他带来金像奖“最佳男配角”奖，“的而且确系入到去，收到第一个剧本，我系好有兴趣！我知呢个系我第二个生命喇𠮶阵时，二次人生！”他几年后曾问陈嘉上当时为何会拣自己，对方说：“因为我睇到你𠮶阵时有个火，睇到你有个火要爆发喇。”讲到拍摄时是否冇预计过这部戏如此成功，他说：“我相信自己嘅火系可以做到一啲嘢出嚟嘅，喺电视台𠮶几年时间，唔系好多好饱满嘅角色畀我真系发挥到，当时，我唔想再等落去嘥时间，觉得不如出去碰碰运气，但某程度上我相信自己嘅能力系可以应付到嘅！就算我唔系好如意𠮶段时间，但我都觉得自己喺应对困难嘅时候，应该系一个比较灵活嘅人。”

谭耀文相信自己入行前在艺术团学到的执生技巧并没白费，而他做演员亦会比别人行多步，每演一场戏都准备好两、三个版本，导演不喜欢第一款，他会立即交出第二款，“如果你冇，你就‘死喇！’成个人好慌张，大家就会‘点呀？’几十对眼望住你，呢个就系我喺娱乐圈感受到最大嘅压力，你要得到一个愉快成功嘅旅途，你要处理到呢啲嘢先。”《拼命三郎》中有句对白：“够打拼就会捞得掂！”对谭耀文来说，最重要都是不要放弃，在你想放弃的时间，要很努力找回自己的初心，“个初心揾得返返嚟先系最大嘅动力，我谂都系呢啲好老土嘅讲法，但系往往真系去到一啲人生嘅低谷嘅时候，你冇第二啲理论可以战胜到呢个，其实真系要拼嘅，真系要准备好自己，做边行都系！”