专访｜谭耀文新秀冠军入行　惜从未开过演唱会：系我人生最大遗憾

谭耀文的演技没有人会质疑，然而新一代似乎不知道他是88年新秀出身，更是当届冠军，撼赢了天后郑秀文，还成为了梅艳芳徒弟。抛低歌手身份多年的他，近日突然推出了新歌《拼命三郎》，原来即使在影坛上发光发亮，成为公认的好戏之人，他在唱歌路上始终有一个遗撼未放低；而当讲到观众总对他在《野兽刑警》、《烈火战车2极速传说》、《扎职》的对白倒背如流时，他竟摇摇头：“我其实唔开心㗎，我根本都唔系呢啲形象嘅人。”
场地：鹅颈桥四季火锅

曾加入杂技团两年　见识明星生活后参加新秀一夜成名

谭耀文自小已经恨做歌手、恨成名，听很多欧西音乐，亦爱跟着日本电视剧、卡通片唱主题曲，年少不知天高地厚，总相信自己都会如同偶像一样，表演时有能力令歌迷跟着喊、跟着跳。中五毕业没多久，他加入了由同学哥哥领班的杂技团，正确来说，应该是艺术团，谭耀文在新秀唱张国荣的《拒绝再玩》，台风十足，结尾的后空翻动作更为表演加分不少，这都是在艺术团所学的，“𠮶个系好多姿多彩，乜都有得学嘅团体，去到演唱会甚至政府市政局嘅表演，分别扮演唔同嘅嘢嘅，有少少小杂技呀，又可以学吓点样打斛斗、体操、学吓小丑Show。”

短短两年令谭耀文大开眼界，工作需要亦常常有机会入后台、见明星，其明星梦亦再也按捺不住，“觉得做Artist好精彩㖞个人生，都几丰富㖞，行出街有人认识，好似好威咁样㖞，𠮶啲好幼稚嘅虚荣感就咁嚟。”无可否认艺术团只是跳板，他认清自己志不在此，开始参加不同的歌唱比赛，当然亦包括让他一夜成名的新秀，“系！𠮶种前呼后拥，有Fans，或者去到世界各地……我第一次去名古屋参加东京音乐节，竟然有日本嘅女Fans嚟接机，真系Unbelievable！你根本就冇可能相信，原来𠮶啲叫做一夜成名。”

火速成为梅艳芳弟子　最难忘师父教“取易不取难”

夺冠没多久，谭耀文成为了梅艳芳（梅姐）徒弟，讲到当中缘由，他说可能只是电视台与唱片公司的宣传策略，当晚梅姐、成龙大哥都是新秀评判，或许唱片公司觉得，多了“梅艳芳徒弟”这个称号，一晚就足以令“谭耀文”三个字响当当，而梅姐又答应，事情于是就这样顺理成章发生。翌日报纸亦果然一如所料用“梅艳芳徒弟”称呼这位新人，但对谭耀文来说，他根本未懂消化，“𠮶阵时19岁咋，我又钝呢个人，咁做佢徒弟梗系好光荣嘅事啦。”梅姐于是带着他、草蜢、许志安去世界各地演出，他坦言：“其实可以冇我哋嘅，佢世界巡回演唱会可以一个人搞掂晒，草蜢可能要啦，佢哋有一啲歌有挐掕（音：naa1nang3、啦能）㗎嘛，系连住咗㗎嘛，但系我同许志安系可以唔使㗎，但系因为安仔同我都系华星当时被力捧嘅歌手啦，可以咁讲，梅姐都好有爱咁揽埋我哋一齐。”

除了赚钱，这位刚成年的后生仔亦有机会去欧洲、入住五星级酒店、享受绝美早餐等等，他最记得是跟梅姐去美国环球影城游玩，寓工作于娱乐。讲到梅姐最让他铭记于心的教诲，他竟说：“佢叫我拣啲歌唔好咁深，哈哈。”当年在外地搭长途车时，谭耀文用Walkwan把自己的新歌Demo播给梅姐听，对方听罢便说：“唔～太深喇，取易不取难呀！”不过因为监制已决定推出这首由Kenny G歌曲改成的《困惑》，所以最终还是收录了在他的第三张大碟《夜深情真》内。

被误解模仿偶像张国荣　哥哥不计较更做出暖心举动

讲完梅姐，当然不得不提另一位巨星——哥哥张国荣，谭耀文自小视他为偶像，新秀都以其歌曲参赛，问他是否仍记得第一次追星成功的画面，他表示：“好靓仔，真系好靓仔！喺后台，发哥都好似喺度……佢系一个好活跃嘅男仔，好Charm、好靓仔。”谭耀文在访问中重演当时哥哥说：“喂，点呀你最近？”、“加油呀！”以及讲一些叮咛说话的画面，大赞对方真的对每个人都很友善，“好Nice，好不羁地Nice，你会俾佢迷到癫！”而作为小粉丝，谭耀文当时只一味傻笑，怕自己不擅辞令讲错话。

之后他说起一件从未公开讲过的事，大家听完会更觉哥哥暖心，“佢送咗一张飞畀我，系佢嘅告别演唱会，佢送咗飞畀我睇。咁我就睇佢挂咪𠮶个Show，最后𠮶个show……哗！Leslie畀飞我，太开心呀呢件事！”凡是迷过偶像的，都想像得到这个时刻何其梦幻，而谭耀文继续解释为何这个举动如此难得，当年坊间有些评论说他刻意扮哥哥，他坦言：“𠮶时我太迷佢，不自觉地会有啲……即系有少少模仿咗佢，但系又好混淆，有啲人话‘唔系㖞，你把声真系有啲似’，你啱啱都系咁讲，我唔系扮，我真系咁讲嘢。但系咁嘅情况之下，呢个偶像唔憎你呢，佢都真系好大方！佢仲要系畀飞我去睇，咁你谂吓，哥哥真系，哗，冇得顶！”

哥哥的举动证明他未有受报道影响，更见其量度之大，谭耀文猜想：“‘呢个后生仔可能钟意我啫，佢表演上有啲模仿，可能都系因为佢出自钟意我啫。’所以佢同我喺后台撞过两次，我完全冇觉得佢对我有任何负面嘅Feeling，反而系好Nice，好Support！”虽然哥哥没介意，不过当时的谭耀文曾被外界的评论左右，说过不再唱哥哥的歌，一来怕触景伤情，二来怕别人说他摆脱不了张国荣影子，加上后来他第三、四只碟已开始摸索出另一种风格，就更加不想走回头路，想一洗头两只碟的形象。当然，到后来，人大了、想法也不同了，他亦在纪念音乐会及登台时唱哥哥的歌，“有个纪念性，话畀人听佢系你偶像，我觉得系骄傲啦。”

曾因伤痕太大及性格不合　拒再提唱歌转型拍戏

除了曾说不再唱哥哥的歌之外，谭耀文甚至⼀度决心撇清及忘记歌手身份，就连人家在他面前说起唱歌有关的事，他都反感，“系呀系呀！即系……条伤痕太大。（伤痕源自于咩？）Sharp cut得太犀利，突然之间停咗冇，冇咗尾。”问到个中内情，谭耀文续说：“有一个好奇怪嘅故事，但系呢个故事我发誓唔会讲嘅，但系会唔会系因为呢个故事，我又觉得唔系嘅，有一半系我都讲过，我自己性格，我觉得唔系好适合做一个歌手，或者我适合系一个Band里面嘅一个Leader，如果我系Bon Jovi咁我就会几爽嘅。”

想当年梦想成真后，他发觉歌手不纯粹是站在台上唱歌这么简单，还有人际等等其他范畴，已超出他能应付和控制的范围，慢慢他发现演戏、一个人匿埋钻研剧本比较适合自己。随著在影坛机会愈来愈多，他觉得自己更应勇往直前，“开始顺利嘅时候，你就要更加再一刀切，‘我唔系Singer嚟嘅！’唔再发梦，唔会再谂返转头，望住演戏，go！”成为演员后，谭耀文的性格亦渐渐起了变化，因为电影中常常演英雄、大佬，他也仿佛变强了，“我遇到嘅角色，令到我要泵胀自己，好膨胀，其实同以前本身唱歌𠮶个谭耀文系好大分别，就算我第一部攞奖嘅戏《野兽刑警》，都系好大分别嘅，所以心理关口系喺年青嘅时候不断冲破，不断冲破，咁𠮶段时间就真系觉得音乐、唱歌，愈嚟愈唔啱我㗎喇。”

曾怕再失望而卸下歌手身份　相隔18年终于出新歌

谭耀文的歌手生涯其实很短暂，大约只得4年左右，入行36年，他近日宣布推出新歌《拼命三郎》，问他是否从未放低唱歌梦想，即使在演员跑道十分成功，仍然很渴望再唱歌，他想了想：“又冇话特别好想，点讲呢？好想呀？曾经真系好想……而家唔知系咪因为经历多咗，又做咗爸爸，社会又经历咗一啲嘢，好多嘢，好多感受，我谂应该话𠮶个目标性冇咁强，而家好难去Set一个目标啰，好大机会令自己失望。所以我唔敢谂。”不过最内心深处的想法，他其实又觉得自己仍然很Ready，因此十分矛盾，“我信嘅系机缘，今次《拼命三郎》呢只歌，咪就系一个机缘。导演个个都好Support我唱返，鼓励我唱，个人物我又觉得啱，咁咪唱啰。”

谭耀文已相隔18年冇再出歌，上一首要数到2006年亚视剧《义无反顾》主题曲《分支路》，他自己亦一直蠢蠢欲动想找个理由再唱歌，今次机会终于到来，重踏录音室他亦难免紧张，“紧张系希望件事好，亦都希望自己唔好俾人觉得老土啰，好惊啰，我自己唔系老土嘅人嚟㗎，点解会惊人哋觉得你老土呢？呢啲都系自己畀自己嘅压力。”疫情期间谭耀文学习打鼓和结他，已有八级资历的仔女在旁弹钢琴和大提琴，令他不禁想：“我觉得都有啲天份带到畀佢哋㖞，咁几好㖞，我觉得我都有啲为佢哋，‘喂，你老窦都唱到歌㗎！’想有一日企返喺个Stage。”

最大遗憾从未开演唱会　获邀澳门开骚竟断然拒绝

讲开带仔女上台，谭耀文道出了自己入行三十多年的遗撼——从未开过个人演唱会。他非常认真地说：“我觉得呢个系一个遗憾嚟嘅，系我人生最大嘅遗憾！我唔想我百年归老前都唔可以实现呢个咁嘅遗憾，所以我咪觉得……呢件事一定要好靓，唔可以Ruin咗呢件事，求求其其做。”过往不是没有人找谭耀文开骚，这几年来不时都有，但他都一一拒绝，为什么呢？他表示：“喺呢几年，有好多人叫我去澳门做我个个人演唱会，我话我唔会做！我喺香港出道，我喺香港长大，我唔会做澳门或者其他地方住，第一个一定系香港！”每个歌手都有个红馆梦，问谭耀文会否都恨去红馆开个唱，他坦言场地、人数冇所谓，100人至1000人皆可，甚至在空地举行都冇问题，最重要是好听。

难理解观众爱睇江湖片　坦言为生计才接黑社会电影

不知道大家对谭耀文最深印象的是什么作品，从网上讨论热度来看，《野兽刑警》揿钉华、《烈火战车2极速传说》的趴地熊、《扎职》的恒字耀文似乎最多人记得，有时看到与他有关的贴文，网民自动波用其对白接龙：“我收咗火啫，唔系收咗皮呀！”、“我恒字耀文听过未呀？钟意可以加个哥字！”“人要恶过车！”笔者讲到这里时，谭耀文却摇摇头，似乎苦笑说：“我冇谂过……咁多人钟意睇呢啲戏。（即系边啲？）古惑仔。”观众认为谭耀文演反骨仔、大佬等等已是教材级，他著实感激，但这对他来说或多或少成了甜蜜的负担，而问心，他不想拍江湖片。

谭耀文不讳言：“唔系我想㗎，我都系为生活、为前途咋嘛，香港有咩戏拍呀？好老实讲，唔系古惑仔片就江湖片，英雄片大家又已经唔信喇。我哋好被动，我都好想拍好多文艺片，我都好努力拍咗几部，《二次人生》，𠮶啲又有𠮶啲嘅好睇，但系江湖片……应该讲系类型片，拍到都冇Budget，又太过冇Visual嘅话，我觉得唔系咁好啰。”笔者前阵子刚好重温了《二次人生》，谭耀文在戏里饰演退休老师，扶持着自己的废青旧生（胡子彤）去练跑，带他重新找出自己人生的跑道，意义是有的，但现实层面去看，确实未必太多观众记得他演过这么一出戏。

角色被定型感无奈　盼观众认识爱音乐一面

演员做某类角色做得入型入格，赢尽赞誉的同时亦容易被定型，谭耀文深深感受到这一点，他直认因此而不开心：“都系㗎，唔钟意㗎，我其实唔开心㗎，我根本都唔系呢啲嘅形象嘅人，我希望人哋知道我钟意爵士音乐、我钟意R&B Music、我钟意印度音乐……我系好钟意音乐嘅人，但系命运俾人记得你嘅就系𠮶啲，即系𠮶啲……江湖𠮶啲，好无奈呀人生！”即将上映的新戏《拼命三郎》，他饰演放监后想从良、学做慈父的前大佬，似乎仍未完全离得开江湖；但另一部刚在加拿大拍摄的多伦多电影，他从影以来终于首次“解锁”歌手角色，饰演移民加国多时的歌手，相信届时可再让观众见到他最想大家见到、热爱音乐的一面。