《爱回家》男星跟剧本锡女演员竟被投诉：佢好不满走去同导演诈型

张达伦早前出席新剧宣传活动。张达伦透露在新剧中与李芯駖首次合作，便要与对方有亲密场口，令他感到尴尬：“其实戏中我嘅角色系蠢蠢地，就算有个女仔喺我面前明示有下文，我都系唔知嘅。而𠮶场戏最激嘅就系讲芯駖色诱我，而且佢个造型尺度好大好性感，性感到系我老婆平时同我做咁。而𠮶场戏大家系有身体接触，咁所以系有啲尴尬。记得其中一幕系佢坐喺我大髀上，始终佢都系新演员，佢起初见到我都惊惊地，咁所以拍呢啲亲密戏前，事前我哋系沟通清楚先拍，避免有不必要嘅误会发生。”

被问到过往拍亲热戏时，有否被人质疑借机抽水？Max表示：“记得以前喺旧东家拍剧嘅时候，剧本写明𠮶场戏有锡嘴戏，到埋位拍嘅时候，我就跟足剧本去演，到拍嘅时候，我就锡咗落个女演员度，点知拍完𠮶个镜头之后，佢好不满即刻走去同导演诈型‘可唔可以唔好再拍呢啲’，𠮶次系有啲尴尬，如果次亦系唯一一次。而𠮶个镜头最终都冇出到街。（大家之后有冇再合作？）冇，可能佢话唔想同张达伦合作。哈哈！（系咪《爱回家》？）爱回家冇事嘅，你可以揾吓。不过可能𠮶次我自己做得唔好，谂住得个信字，埋位就即演。其实应该喺拍之前，大家要细心沟通清楚，咁样相信系会好好多。自己以前可能太年轻，冇谂咁多，剧本写乜就演乜。经过𠮶件事之后，自己拍呢啲戏都会同对手沟通清楚，避免产生误会。”