黎爱莲设灵｜女儿梁子文透露母亲带微笑离世：叫佢放低唔开心嘅嘢

梁小龙前妻黎爱莲 （Irene Ryder）于9月1日于北区医院安祥离世，享年75岁。今日（4/10）九龙殡仪馆地下德望堂设灵，并采用天主教仪式进行，让亲友作最后道别。黎爱莲女儿梁子文（Anne）接受《香港01》时表示：“妈咪走嘅时候都好安乐，系带住微笑离开，佢而家好安详。其实妈咪佢系心跳停止咗，去到医院抢救返，但三日后就走咗。而喺呢三日里面，佢系听到我讲嘢，我叫佢放低晒所有唔开心嘅嘢，返去天主𠮶度。（佢有咩唔开心？）呢啲大家都心照知道，咁但系有好多嘢都过去咗，大家都将佢最美好𠮶一刻留低，记住喺心里面已好足够。”

被问到妈妈心脏是否一直有问题？Anna表示：“其实系因为佢做咗好多次嘅手术，变咗心脏系比较弱少少。而其实今次妈咪系肺炎走嘅，咁佢系上呼吸道感染，加上年纪都大，又唔乖，唔肯去睇医生，而佢本身系想喺屋企走，今次佢真系喺屋企走咗。（系咪长时间冇出街？）妈咪佢唔系咁钟意出街，唔想去面对咁多人，因为有时会不停咁问，同埋会讲埋啲嘢，佢系唔钟意答，变咗通常都系匿埋喺屋企。（匿埋几多年？）其实佢间唔时都同啲学生食饭聚会，只系冇咁活跃。”