胡美仪报读心理辅导博士：我毕业就过70岁

胡美仪今日（3日）出席画作慈善义卖活动，并捐出亲自绘画的情绪画作15张，获老公毛俊辉现身撑场兼送上鲜花。胡美仪接受《香港01》访问表示：“今次系慈善邀请我，我啱啱上紧心理辅导博士嘅课程嘅时候，教紧我个科就系诠释学同埋心理学里面系讲紧点样将自己嘅专长去贡献社会，同埋点样去体验自己嘅人生经历。”她继续指顺势答应慈善机构有关举办画作义卖。

自爆修心理博士读到70岁

讲到近年转战做心理治疗师，她表示：“系呀！其实由2019年开始已经正式投入做心理治疗师。”被问到自己的心结，她坦言：“就系我冇书读嘅呢个心结，因为家庭贫困，我净系读到中二，呢件一路都系我一直长大嘅心结，所以好唔开心好唔快乐，直到50几岁嘅时候，我接触到心理辅导呢个学科，就可以一尝我嘅心愿。”她分享已经修读一个学士学位，同埋两个硕士学位，并笑言：“而家报读一个心理辅导博士学位。（要读几耐先毕业？）我谂要再读多两年，我毕业就过咗70岁。”

揭50年心结

提到较早前接受访问鼓励郑梓浩做辅导，她表示：“我觉得每一位嘅朋友就算有啲乜嘢发生咗，都系值得去关怀，鼓励佢点样可以令到自己舒服。我可以自己做例子就最好，50几年都唔快乐，唔知道细个嘅时候有啲乜嘢心结纠缠，令一生都唔快乐，所以要帮助啲朋友同佢去倾偈。”她强调不是只局限鼓励一个人，而是包括社会大众。至于会否希望与演艺人协会合作，辅导艺人有关情绪方面的问题，她表示：“我随时欢迎，我个心打开向社会大众，唔单只系演艺人，如果有需要可以揾我。”

望有机会上台唱歌

讲到日后是否有机会再上舞台唱歌，她表示：“我而家嘅专注力就系要读埋心理博士，我日日要睇好多书唔能够分心，我呢两三年要向心理辅导专心，好老实我有挂住唱歌，所以我都揾紧机会点样将两样嘢可以去合并，我谂住将50种情绪唱出嚟，揾一首歌去唱出嚟，去同唔同阶层嘅人分享！”