【不服来辩】《射雕英雄传》收视排第三 无线情何以堪？
内地剧《射雕英雄传》上星期正式播完，这套剧在内地其实已经播完一段时间，有心睇一早已经上网追晒，而且无大陆一线影星撑场，所以当初无线买入播其实无人睇好。大家认为此剧只会沦为《女医．明妃传》或者《锦绣未央》咁放喺七点钟无关痛痒时间，得到可有可无嘅十几点收视就完成任务。
点知无线大胆地放在八点半黄金时间播放，正当人人耻笑无线发神经时，Tvbuddy就大巴大巴咁车落各位块面度，最后拎到平均25点，最高27点的收视。呢啲收视代表啲乜？唔系话好好，不过已经成为TVB 2017上半年的收视第三位（第一、二位是《亲亲我好妈》和《不懂撒娇的女人》），撼赢晒同期嘅《兰花刼》同《赌城群英会》，赢埋上一任嘅《全职没女》。买套内地剧返嚟就轻轻松松执收视，咁系咪代表无线好成功呢？咁谂真系错得交关，一套已经播完嘅大陆剧可以打沉你自家剧，呢个绝对系警号。
高层内斗显威风 内乱未平无所从
呢套剧可以上到半年收视第三位，系咪代表套剧真系好？其实可以反转嚟睇，系比佢打低嘅剧真系好差！先讲同期嘅《兰花刼》，话说当时要播呢套十年前嘅低清剧已经惹起好大嘅回响，一套系旧剧，一套系大陆剧，你TVB系咪玩嘢呀？但原来系有段故。根据消息，某高层买咗《射雕英雄传》返嚟摆喺黄金时段播，就惹来另一高层不满，所以就决定拎返套仓底货出嚟对撼，如果用《兰花刼》成功打赢重金礼聘嘅《射雕英雄传》，自然就威风八面松毛松翼。可惜，事与愿违，《兰花刼》平均收视只得可怜嘅18点，18点系一个咩概念嘅数字？系仲低过《东张西望》同《爱·回家》，即系啲观众睇完呢两个节目再熄电视跳过《兰花刼》𠮶一个钟再开返电视睇九点半呀！能令到观众们咁有心机去罢睇呢套剧，硬推《兰花刼》𠮶位高层就紧系面目无光喇。讲到尾又系高层嘅权力斗争，你TVB本身已经做得愈来愈差，啲平均收视愈来愈低，想当年一套《男亲女爱》可以去到最高50点，你而家有30点都话要搞庆功宴？请问系咩功？班高层就好似一堆受晒伤嘅井底之蛙，仲喺度玩蛙打蛙，想逃出生天？难喇！
咁你话TVB系咪真系无心搞落去？又唔一定㖞，不过用错方法啰！好地地你走去搞Big Big Channel，简称BBC（当初听到呢个名我仲以为系真𠮶个BBC）。用晒全台资源去搞，港男？Cut！拍剧？削！演员？谷！为嘅就系要搞好呢个BBC，可惜嘅系过咗个几两个月，都依然系一潭死水。一来佢初头个验证问题搞到好多人都玩唔到，已经系一个败笔，二来佢呢个开live嘅玩意，已经被Facebook、Instagram、当年嘅17等等社交程式玩到烂晒，你旗下嘅星要开live大可以喺呢啲app度开，我点解要专登开你个app去睇？当然你可以要你啲星力谷BBC，就好似而家嘅情况咁，不过你嘅受众都系得一班死忠，完全做唔大块饼，不如俾多啲钱去拍剧好过喇。
套路已是意料中 旧有佳作已成梦
讲完公司问题，讲吓TVB本身剧集嘅质素。你话剧本系咪真系好差？其实都偶有佳作，就好似《亲亲我好妈》同《不懂撒娇的女人》，不过最高都只系得31点收视。上年认真制作兼久违嘅功夫戏《城寨英雄》最高有35点，玩穿越嘅《EU超时任务》最高都有30点，TVB如果肯认真制作一个好节目，其实系可以交到货。由其系题材，唔好再拍啲追凶呀，寻仇呀，争产呀，来来去去都系套路，呢啲观众睇到闷嘅剧情。功夫，TVB好少拍；古装，TVB无钱同大陆争；穿越呢啲一定收睇嘅又系少拍，《射雕英雄传》拍咁过咁多次都收得，TVB有几可拍小说题材？你话武侠古装小说拍唔到可以放过你，俾钱买普通小说或者网络小说都唔肯？美剧风评好，你出套《踩过界》跟风都唔紧要，但你又将佢摆去星期六日播，星期六日有几多人夜晚坐定定睇电视呀？但佢平均都有接近20点，最高都去到24点，好过你《兰花刼》。TVB唔系拍唔到好剧本，系唔肯拍，见某一套剧收得，咪继续拍落去啰，《金枝欲孽》、《巾帼枭雄》、《溏心风暴》、《宫心计》，全部都系翻炒再翻炒，仲要系台庆剧，用晒啲成本都唔肯创新，咪一直故步自封啰！
潜力新人未敢用 大台步向亚视冢
《射雕英雄传》成功之处，一来佢用成两亿去拍呢套剧，啲景靓到不得了，呢样嘢应该等到宇宙灭亡TVB都做唔到，所以唔讲。剧本系金庸小说，一定有保证，但TVB亦未必出唔到一个好剧本。接落嚟嘅就系演员，《射雕英雄传》导演讲过，因为大部分钱都用咗嚟取景，所以无钱请大星，唯有请啲唔红嘅后生演员，结果系点？个个主角都爆红。TVB用咩演员？主角来来去去都系𠮶一堆当红小生花旦，完全系唔会起用新人去担大旗，人哋用两亿都够敢搏，点解TVB仲可以喺度缚手缚脚？即系如果你话本身都已经好把炮，不求有功但求无过咁就无说话好讲，问题系你已经系衰落紧，都仲唔肯去求变？虽然话唔系用新人就一定用好结果，但起码要去试下，子华神都讲过：“唔赌唔知时运高，唔拍唔知票房好。”好彩嘅系而家香港其他嘅免费电视都依然系唔争气，所以TVB都仲未闻到阵棺材味，咪继续hea住先，结果受苦嘅只会系一班观众。