林家栋跌伤导致肌肉撕裂　拒医生建议揾姑娘协助如厕

林家栋早前因受伤而要留港医治，未能与纪录片《香港经典 光影重塑》团队出席《FILMING ITALY VENICE AWARD》活动，家栋今日现身棋人香港十周年发布会时，透露是因为落雨跣脚，滑落六级楼梯令肌肉撕裂。“伤骨都还好，肌肉撕裂系要自然修复，同堆要食‘懵仔丸’减轻痛楚。”家栋透露留院休养时，医生曾建议他用尿兜或揾护士帮手，但他因难堪而拒绝，问到点解唔揾护士帮手，他笑称：“我要发现自己嘅能力，我唔会假手于人，无人𢭃到我。其实距离唔算好远，就算肚痛都要自己。”

另外，提到香港电影业面临开戏不足问题，家栋指将会与电影发展局开会，到时会更详细去了解。“我觉得唔系单单有工开咁简单，系要有成绩、潜力俾人睇到，先会有人愿意投资。如果斋开工意义未够，成绩系显示到有几多观众去睇，呢个先系最值得探讨嘅问题。”问到家栋会否关心身边嘅幕后工作人员有否遇上财政困难，他即苦笑：“唔好讲，我都跌咗啲。环境确实系差，我有收到电话希望可以协助，咁我有协助。但咁多年积落嘅东西，唔系一下子可以做到，系幕前幕后都都要倾点做，唔系打工系打仗，因为电影系freelance ，唔得就拜拜、无下次，所以一定系要每次做得好先有下次。”家栋预计呢场仗要打两三年，而他如今睇剧本时更为费神，望在有限资金情况下做到最好。