独家｜62岁移民艺人爆签约奥地利经理人公司　重操故业接首个广告

现年62岁艺人杨英伟2020年底举家移民奥地利，携同年逾90岁的父亲及妻儿一同移民，并成功取得当地居留权，他曾大赞当地物美价廉，月租一万蚊可住1300呎大屋，早前杨英伟透露“一Take Pass”成功考取德文B1，预计下年年尾申请奥地利永久居留权。杨英伟日前再接受《香港01》独家访问，透露在奥地利重操故业做演员，更成功接下当地首个广告！

杨英伟忆述，透过朋友介绍接下广告，他在广告中饰演亚裔大老板，导演原预定拍两个多钟头，杨英伟凭多年演艺经验，只用了一个半钟便完成，杨英伟更获导演以德文大赞：“呢个真系演员！”翌日杨英伟已获经理人公司接洽谈签约事宜，他谓：“到第二日，Model公司嘅负责人已经揾我，佢哋听返拍摄团队都好赞赏我，希望我授权畀佢接Job，算系佢哋旗下艺人。”杨英伟说：“佢哋话呢度冇亚洲脸孔嘅电视演员，特别系中国。”双方一拍即合，杨英伟上周已完成签约程序，他说：“上个礼拜见负责人，佢好开心见到我，见咗一轮又握手，已经签咗啲嘢、畀咗资料，佢哋应该好快会见客、Sell我，帮我接Job。”对方态度盛意拳拳，“个负责人话：‘我哋会Sell你㗎！’咁佢哋可以赚多啲佣金、我又可以赚多啲。”而广告报酬亦相当不错。

杨英伟很开心能够重操故业，“从来冇谂过嚟到维也纳，过退休生活，竟然可以做返演员！”杨英伟形容今次如“沙漠中见到水泉”，他娓娓道来心路历程：“本身我都叠埋心水，你嘅专业已经冇用，我做移民呢个决定比较心痛同辛苦。喺演艺界我又搞公司同舞台剧，又做MC，冇做TVB过咗去HKTV。HKTV几年后攞唔到牌执咗，帮Viu TV我都拍咗好多剧。𠮶阵欧锦棠《打天下2》其实预咗我，但后尾由于要飞返嚟拍，又唔想离开屋企人，同埋我读德文要考试，所以推咗佢，我留港一定有演员做，而移民维也纳我谂：‘你死咗条心啦！唔会有㗎啦！冇㗎啦！’但而家系绝望中见到曙光，沙漠中见到水泉！”

杨英伟9旬父听到儿子能够接下广告大吃一惊，他笑说：“我老窦听到话：‘嚟呢度有嘢拍？拍咩呀？拍乌蝇呀？’我话咗畀佢听后，佢话：‘好嘢㖞！’”太太亦非常支持：“佢非常支持，又系𠮶句：‘感谢上帝！’真系好感恩！”

杨英伟指能够重拾演员身份已非常满足，今最想拍电视剧，“一年都有几个Job，如果一个电视剧讲到两句对白，我已经好满足！”杨英伟开心称：“我恢复返身份、恢复返我嘅尊严。”杨英伟庆幸学了德文：“如果我冇学德文，去到基本人哋叫我企咗啲、右啲都唔识听！”他亦鼓励大家：“只要学人哋嘅文化、学人哋嘅语言，唔会冇嘢做。”他预计广告将于10月、11月出街，并称有好消息会通知大家。