孙慧雪自爆老公晚晚追《美丽40路》睇肌肉 ：佢仲叫我勤力啲

孙慧雪离巢无线后密密接Job ，今日（16日）为益生菌产品拍摄广告时，不停卖口乖大赞产品有用。“我生完之后差不多170几磅，都几夸张，而家都减咗50磅，但都想再落多少少磅。”孙慧雪虽然话饮食清淡加运动系最有效，但亦自认十分为食，中秋将至，收到不少客户送嘅月饼，她每款口味都自留。

提到有份主持嘅《美丽40路》，孙慧雪自爆老公每晚都有追播，更劲赞有肌肉嘅佳丽特别正。“佢话原来大只都几吸引，同埋爽朗，佢仲叫我决赛就快到，唔好食咁多，晚餐同我争嘢食‘你睇下人哋几fit ，你真系要勤力啲’，明明我之前去操肌时，佢话唔钟意，但而家又话愈睇愈靓。”由于节目是孙慧雪首次主持嘅大型节目，所以她十分紧张网民反应，“第一集用心剪晒啲呆样，听到feedback 话我生完呆，但之后亦有人话我嘈，因为我怕气氛唔够，如果有第二季我会做得更好，今次真系学到好多嘢。”孙慧雪又指4位主持人各有风格，而刘明轩、黄心美压场感是她想要学习的。

离巢快一年，问到孙慧雪是否满意成绩，她表示：“满意，点解我会用一年时间做咁多嘢，我仲生埋仔，收到又好好，真系美丽40路。”