葛民辉拒收徒弟宁义务创作　黎诺懿盼与爱儿齐拍《四叶草》

黎诺懿、葛民辉现身昂坪360出席“童悠共享 花灯照昂坪”中秋活动揭幕礼，葛民辉仲将“亲生仔”HEROIC KOGIANT结合中秋元素，化身嫦娥及玉兔，将传统和现代结合！黎诺懿为享乐行慈善基金会共同创办人，佢哋揾超过100位小朋友画画制作灯笼，为昂坪嘅游客送上祝福：“自己负责揾人帮手，今次都系靠亚葛嘅创意！之前同佢开会都好紧张，好想入去佢嘅Studio参观，因为佢有好多收藏品，但暂时未有资格入去。”

刚刚九月开学，黎诺懿都化身做“凑仔公”接送爱儿返学，仲话有妙计令小朋友唔喊：“每日返到学校我都同佢讲‘你望吓𠮶边’，之后急速逃走！慢慢佢都习惯冇再喊啦！之前暑假我地带小朋友学滑雪，返到嚟再开始学剑击，本来哥哥因为套衫唔够靓，唔想再学落去，但我同佢讲爸爸当年拍‘四叶草’，依家传承去第二代，再大个啲可以父子档一齐拍‘四叶草2’，又或者佢承传奥运都唔错。”

葛民辉联同昂坪360董事总经理董沛铨为中秋摆设揭幕，仲分享呢次设计心得：“其实佢地好有善心，想比机会啲小朋友发挥创意，真系唔话得！今次我都系靠把口去指指点点，团队负责落手做！”呢次中秋展览活动葛民辉隔空与幼童“Cross over”，佢就大赞小朋友创意十足，但拒绝“收徒弟”传授创意：“我怕我太长气，佢地以为系入室弟子要帮我‘洗底裤’，我又怕教识徒弟冇师父呢，所以一齐玩就得！”佢闻说黎诺懿欲参观自己创作室，佢就叫对方“ 摆低啲按金”，欢迎对方随时到访。