Gin Lee曾不想活下去 爆喊讲周殷廷谷底受委屈：几多白眼都冇放弃

Gin Lee（李幸倪）与周殷廷（YT）曾是环球唱片同门，两人因而结缘，后来成为闺密。在YT演唱会上，担任嘉宾的Gin Lee却喊得比主角更厉害，YT从此号称“令Gin喊得最多嘅男人”。二人近日合作拍片，在营地情深对话，将不少内心底话都讲出口，例如Gin Lee常被网民嫌闷、唔识做新闻等等；而当Gin Lee忆起当日见到YT经历人生谷底，过住非人生活时，更再一次爆喊。

Gin Lee说以往跟YT虽然同门，但仅是点头之交，在MV中扮情侣更是十分尴尬。不过有次在邮轮上，Gin遇到色狼，YT的爸爸跟她说：“你要学下功夫，识保护自己呀！”令她十分窝心。被问到会否做情侣，Gin答：“做好朋友或者亲人可以一世，做情侣未必可以一世。”

两人从来不会畀压力对方，Gin坦言在圈中朋友不多，能交心、共患难的更是少之有少，但YT却大爆两人倾电话可以倾14至16个钟，“我少讲电话，除咗同你讲电话。”Gin说：“我会觉得唔系个个人都明白自己，所以有时就唔讲啦，好多时候我唔讲你都会知，好容易喺我角度去谂嘢，所以我好愿意同你讲好多我受嘅委屈，工作上嘅唔顺利，甚至有段时间我猫猫走咗之后，𠮶段时间我系好沮丧，冇活落去嘅动力，你畀咗好多鼓励我去做《Dear Secret》个project。从一个唔想返工，唔想生活，乜都唔想做嘅一个状态，可以藉住我嘅工作嘅创作慢慢释放，系好痛苦嘅一个过程，亦都系好疗愈。”YT当时问了很多刺痛Gin Lee伤口的问题，他认为是残忍而必须的，因为痛苦的时刻过了就没有了这种感觉。

Gin Lee说大家现在认识幕前这个YT大哥，但自己却见证过做幕后的YT，她说：“因为你知道冇得做歌手，无日无夜咁赶剧本，有乜嘢机会就去搏，攞条命出嚟博，真系攞条命出嚟搏，靠你自己，一手一脚走出嚟。”说到这里，Gin Lee已开始忍不住眼泪，解释为何在YT演唱会上痛哭，她说：“就系我谂返起呢啲，大家未必会明，但系因为我系同你一齐，我𠮶时都受好多委屈，但系我觉得你受嘅系仲多啰。”

YT深呼吸一下，Gin Lee续说：“我会觉得你𠮶段时间系非人嘅生活……”YT答话：“𠮶刻我完全detach我嘅情绪from我嘅人生，希望每一步行到去，行过呢一段时间。”Gin鼓励对方说：“其实我一路都觉得你得㗎！由Day 1识你，觉得你冇理由唔得呀周殷廷？又唱又跳，咁多talent，一定得！点解唔得？但系可能时机。好欣赏你一样嘢，就系就算人哋睇唔起你，受尽几多白眼，或者直程睇你唔到，你冇放弃，装备自己，就系等紧一个机会，我觉得好劲！”

Gin Lee又表示自己曾忽略了陷于谷底的YT，因为自己都难受得无空间去照顾他，她知道YT不会怪责自己，但亦难免内疚：“有一次你好random咁问我，你会唔会觉得好孤单？我答你‘OK啦。’我返去喺度谂，点解佢会咁样问我，因为呢个系你感受，周殷廷都好孤单。呢条路成十年都系自己喺度慢慢用一块一块砖，去起一间屋出嚟，劲啰，好戥你开心！你而家拥有嘅一切，you deserve it。我约你约唔到，我系开心㗎！”YT说自己之前很少玩社交媒体，不喜欢跟人聊天，因为当时在谷底，不知道跟谁说，也说不出口，不想把负能量压在别人身上。

Gin Lee一直以来于网民心目中的形象，相信是“唱得，但好闷”，一向上开连登的YT说，自己若见到这些评价都会截图畀Gin睇，“纯粹系你要知道发生紧咩事，因为连登有佢可取之处，连登最钟意讲Gin Lee真系一个好鬼死闷嘅人，搞唔掂，点解系一个好闷嘅人呢？因为佢系一个正常人，一个正常人嘅性格系会观察身边人嘅心情，睇紧啲咩，咁佢讲嘢嘅时候佢会非常之小心，希望唔好令大家难受，喺正常人世界里面你会同呢个人做朋友，不过喺娱乐嘅世界里面，你咁样嘅表现就系最闷㗎喇，因为冇嘢睇。所谓花生，人哋想睇啰，就系爆啰，你闹𠮶个人、你讲粗口，负面新闻，想睇！我觉得连登讲嘢系啱，佢话你闷，但系亦都系因为你唔会特登去制造新闻，你系尝试用你真功夫去Convince（说服）大家呢个系我嘅音乐，呢一面系网上嘅人唔会有意识去谂你嘅嘢，因为去到最后，就系𠮶5秒，我（上网）碌唔碌到，好笑㖞，嬲㖞，正㖞， Gin Lee？冇嘢，就系咁。”

Gin Lee亦有为自己被嫌闷一事发表感受，她说：“大家觉得我嘅闷，其实我净系做返自己，我就系情绪好平稳嘅人，呢样嘢好难㗎！情绪好平稳好易做咩？你试吓！系咪先？几嬲嘅时候都唔发脾气，系仲难过发脾气。我明大家系钟意睇啲好爆嘅嘢，但系我希望我做自己，就算喺一啲人眼中几闷都好，喺其他人眼中都系有价值。”

两人目前皆处于事业上升期，YT很想见到Gin攞女金，相信这不止是对她本人，亦是对身边所有支持她的人有一个交代，又指今年1月1日Gin在叱咤台上，点名对YT讲的一番话，对他也是很大鼓励，自己都好想见到Gin开四面台。而Gin Lee都相信YT会在不久将来开到红馆演唱会，以及攞到“最受欢迎男歌手”奖，表示自己必定会投他一票，也可陪他备战红馆演唱会，二人表示：“睇下你先定我先。”

YT又说：“我觉得会睇多嘅人都会嚟睇你，亦都相信会嚟睇你嘅人，都会嚟睇我，𠮶班会听晒我哋讲所有嘢嘅观众，我觉得佢哋会明，佢哋想见证呢两个人由唔同嘅地方嚟到香港，去到佢哋尝试努力，佢哋有少少成功有失败，但仍然不断行落去。我相信佢哋会想见证我哋成功𠮶一刻，所以我相信一定会做到。”最后，二人以三个字为整段片作结，就是“红馆见！”