朝比奈彩获钟培生睇中来港工作　升级做人母晒长腿依然少女感十足

凭Netflix 剧集《今际之国的有栖》饰演跨性别人士水鸡光而人气急升的朝比奈彩，今（11日）在港为美容品牌拍摄广告，身穿红色长裙大展白滑长腿的她，相当漂亮。而在接受访问时希望有更多机会到海外工作，以及表明想多尝试拍武打戏，想做武打女星。

朝比奈彩因工作关系已是第二次来港工作，问到再一次来港有何感受时，她就表示：“今次因为工作嚟到香港所以行程上都好紧凑，冇乜时间去观光，如果有机会的话都想去欣赏香港嘅夜景。（有冇话想食咩香港美食？）芒果好似比较盛行，可能食芒果嘅食品或者肉碎嘅馒头都比较有兴趣。（有冇话想同边啲香港艺人合作？）对香港艺人不是太认识，调返转如果有香港艺人想认识我，希望可以邀请一齐合作。”

受到钟培生（Derek)邀请来港工作的她，问到如何促成是次合作时，她就扬言：“因为《今际之国的有栖》呢套剧集，所以令到钟生都有留意，所以得到佢（钟生）嘅指明合作，我都好有兴趣对呢份工作，所以就接咗呢个工作。”事关这个美容品牌，Derek是作为投资者之一。续问到在拍摄时最大挑战是甚么时，她就直言：“最大嘅困难就喺语言上面，始终广东话同日文好唔同，可能喺拍摄嘅过程，今朝拍摄嘅时候都有好多广东话嘅指示，虽然呢啲只是喺动作上面可以应付到，都好迅速地解决咗，但喺拍摄上始终沟通好重要。”

在2021年已升级为人母的她，无论样貌还是身材都保养得相当好，依然少女感十足，问到如何保养时，她表示：“要靓嘅话其实要由内靓到外，所以身体中嘅成份去保养其实好重要，所以每一日会规定自己饮2公升嘅水，喺外在会擦返一啲好嘅skincare。”同时她亦有做运动习惯，至少一星期会做4日运动。

最后，问到工作动向时，她扬言想多挑战武打角色：“《今际之国的有栖》呢度剧令到喺海外都有啲名气，所以希望嚟紧有多一啲关于海外嘅工作，同埋都想尝试拍武打动作片。（想做打女？）对武打动作本身有兴趣，可能打斗、出拳、踢脚呢一类，对武打好感兴趣，嚟紧想尝试吓呢方面嘅挑战。”而私下的她亦曾受过空手道、拳击训练，绝对令人意想不到。