杨证桦沈可欣演聋哑日练10小时　冇谂过放弃：演员系我终身职业

《踩过界》来到第7集，讲到疏忽照顾儿童案例，并由杨证桦和沈可欣饰演夫妻，之不过这对夫妻均是聋哑人士：杨证桦后天失聪，懂得说话但不太清楚；而沈可欣是先天失聪，只会手语及读唇。眼见他们所做的动作及言语，真系好考演技。昨晚剧集一出街，获得不少网民大赞做得好似，演技获得认可。有趣的是，不少观众现在才知道两人在现实世界都是夫妻。

《香港01》就问到杨证桦与沈可欣，两人收到剧本之后，就开始密集式学手语及模仿聋哑人士。杨证桦说：“我哋去咗聋哑中心跟老师学咗3堂，之后就录低啲片系咁练，放工就开始系咁练，一日起码至少练十个钟，呢个过程持续咗一个月左右。我太太就辛苦啲，佢就要学手语，要记多好多嘢，记到就快崩溃。”太太沈可欣补充：“之前都有兴趣学，就系工联会都学过3个月左右，但今次压力好大。因为始终系聋哑人士专有嘅语言，唔想做错。有时候NG，剧组人员因为唔识，唔知有错，所以我都要主动报案，真系连瞓觉发梦都记住自己做手语。”从他们口中都感受到两人的专业。

杨证桦是众人眼中的绿叶王，他在2010的《巾帼枭雄之义海豪情》做宫崎少佐非常出色，还被前金牌监制李添胜大力嘉许，他都说：“算系我入行咁耐，最难嘅角色，要特登学日文。”成为了“绿叶王”，他先笑了笑，再问：“即系唔系主角咁解？”不过，他坦言喜欢这个称号：“其实今次呢个单元，虽然得𠮶4集，但我同老婆都算主角吖！做演员其实预咗付出同收获唔成正比，但一套剧剩系得主角又得唔得？未必系咁，自己做好角色，有人欣赏系开心，但自己至少满足咗先。”杨证桦做绿叶自得其乐，更视之为终身职业：“从来都冇谂过唔做，我好敬重陈鸿烈，就算咩情况都好，佢一心都系谂住演戏。”杨证桦深信总有一日都会有人欣赏：“有啲人被力捧，但冇好好发挥机会，咁自己努力去争取机会之后，就好好做落去，祥仔（黎耀祥）一直都好努力，而家都上咗神台。”提到自己的机遇未必与他人一样，他说：“无办法。”

除了是演员，杨证桦有份投资三间餐厅，比起拍剧，做老板好似仲好揾啲。他却连声否认：“唔系㗎，会蚀钱㗎，有阵时餐厅都唔会个个月赚钱喇，睇住盘数其实压力好大㗎。如果拍剧同做老板二选一，我宁愿拍剧喇，一嚟真系钟意，二嚟监制肯畀机会我，有多几套剧拍，我可以赚多啲奶粉钱喇，而家个仔仲细吖嘛。”太太沈可欣都话：“虽然系公司踩足30个钟都试过，试过08拍完，收29（凌晨5点），屋企都住得远，唯有瞓一阵再开过，不过都好在一个月得几日系咁。”两人都会Keep住做，赚多啲奶粉钱。

有不少观众现在才知道杨证桦与沈可欣坚系两公婆，杨证桦听罢笑住：“佢哋可能冇睇到新闻啫。”两人相识已有十多年，但到后期才相爱，再结婚：“其实阿沈读演艺再入行𠮶时，我已经识佢㗎喇！当时都想沟佢嘅，不过timing就唔啱啰。”杨证桦笑言：“其实好多人知道我哋结婚、生仔，都呆咗！因为佢哋觉得我哋识咗咁耐，兜咗咁大个圈先至一齐。（咁咩原因令到你哋走埋一齐？）当时大家都单身，我年纪都唔细，见到同佢咁夹，我就觉得系缘份嘅安排。”杨证桦与沈可欣相识十多载，后来拍拖年多就已经结婚，这个过程十分之快，“我哋本来系bestfriend，后来一齐咗之后，上天就赐咗礼物畀我哋，就系小朋友，都觉得系时候要组织家庭，冇㗎！系好老土，但真系缘份啰！”就算现在结婚，两公婆的感情都很好，“就算有拗撬，大家出发点都系为小朋友好，我哋唔会将唔开心留过夜。”真系好恩爱！