MK仔炒车笑住自拍　Bob撑：之前撞车都有Selfie，后尾仲要赔4万

后生仔女最钟意玩Selfie，出街食饭永远相机食先，拍紧拖的情侣，更是频频Post新相上网放闪，开心事同大家开心Share，让其他人葡萄一番，当然无可厚非，但想不到遇上不幸事件，都有人钟意Selfie。讲紧的是近日在讨论区疯传的一张炒车相，车头撞到凹晒兼爆开，但司机同三位乘客就毫发未伤，仲开开心心玩自拍，笑容仲灿烂过卖牙膏广告，随即被网民笑他们“撞车好威咩？”、“MK仔影车头相”，认为他们撞完车仲要呃Like，行径相当无聊。

事主炒车自拍让网民耻笑，但原来艺人林盛斌(Bob)都有类似经历，一样是撞车后自拍再放上网，而他就力撑炒车的事主，他接受《香港01》访问叫网民不需要太过认真，他忆述之前的撞车经历，“𠮶次我同屋企人一齐，庆祝父亲节去迪士尼，系我自己唔小心，在旺角撞到人哋架车，完全系我错架嘛，梗系落车say sorry啦，仲记得𠮶位系印度籍司机，佢都系载住屋企人，最大镬系我𠮶架系又残又旧，烂鬼七人车，人哋就新落地一个月唔够嘅Audi新款，之后我赔咗4万蚊，真系我唔啱，最紧要无人受伤，跟住我同佢影张Selfie。”

Bob笑言当时都算是苦中作乐，令到自己轻松点，“我记得对方系律师嚟嘅，最好笑系第二晚佢Whatsapp我，问我系乜嘢人，原来佢第二日返工已经好多人知佢撞咗车，好多人睇到新闻同我嘅Facebook。我觉得网民反应唔需要咁大啰，讲返𠮶几个小朋友，佢哋好好彩啦，大难不死，梗系影张相先，有时外国有人屋企火烛，都影张Selfie啦，总之平常心对待啦。”做人最紧要有正能量，炒车有乜好惊，拍返张靓相先啦。