黄依汶送8岁仔去黄埔青少年军校受训　挨得唔怕苦网民赞有家教

黄依汶（Emme，前名）与陈国坤结婚后，于2016年诞下囝囝陈真，不经不觉儿子已经8岁。婚后从商的Emme，5年前将手表生意卖盘，全职做廿四孝母亲，培育陈真成文武全才，同时一直避免纵坏囝囝，教他种菜、救雀、洗碗、洗衫，绝不准过份依赖工人姐姐，不少网民都赞陈真有家教好懂事。

Emme曾在陈敏之YouTube节目《Chi Chat》中分享教仔之道：“冇人天生识凑仔，我系睇好多育儿书，我仲会储起一啲有道理嘅文章去提醒自己，用咩方法去凑小朋友先啱。因为生咗小朋友出嚟，我哋要对佢负责任，教育小朋友有一个好嘅习惯，自然会影响到佢，拥有到好嘅性格。”

而近日Emme就送陈真去深圳的黄埔青少年军校体验营特训7日，他要接受军事训练、学识自理等等，见陈真身穿军服做任务，烈日下满头大汗很辛苦仍坚持下去，年纪轻轻却实在相当挨得！而其中一个环节，一班小朋友要睇父母的家书，一班小朋友都喊晒，场面感动，出营后陈真立即扑上前揽实妈咪，喊住问：“点解你写封信咁感动嘅？”

而被问到训练七日后有何感受，陈真就说：“一半钟意同一半钟意啰，因为都几辛苦同埋天气好热。最痛苦都系挂住爸爸妈咪，呢7日见唔到我好爱嘅人，真系有啲辛苦！”由此可见，黄依汶真系好识教仔，同陈真关系劲好，网民亦再次大赞他乖仔又有爱。

而Emme将受训花絮剪成片段，留言：“暑假最后一站去到青少年军校特训营，对于一日都从未离开过屋企嘅你，去到一个未知嘅环境接受严格训练，的确是大挑战～当日你忍住眼泪拥抱我们 深深呼吸 头也不回就步入学校，那一刻你勇气无限大🩵一路上有好友嘅陪伴 一齐适应 一齐学习 一齐自律 一齐自立 一齐训练 一齐担当 一齐日晒雨淋 一齐洗衫 一齐洗地洗厕所，一齐笑一齐喊一齐撑，的确系一个非凡嘅体验！愿所有泪水与汗水能化成你成长中一个坚强的印记。”圈中人如周家蔚、林芊妤都表示想送仔仔去体验一下。