试当真豪哥误判神徒反应 否认心地差嘲笑Anson Lo：无心伤害同业
由游学修、苏致豪（豪哥）、许贤创办的YouTube频道“试当真”，近日得罪卢瀚霆（Anson Lo）粉丝“神徒”，卷入公关灾难。日前他们邀请多位艺人挑战“忍笑铁人耐力赛”，参加者要睇20条忍笑片，忍唔到笑就扣分，而会员频道中的其中一条忍笑片是Anson Lo的 《Hey Hey OK!》MV片段，神徒嬲爆闹试当真心地唔好取笑偶像，难以接受，指游学修举动与自己过往的言论相违背。
试当真被骂后已急急下架短片扑火，并发道歉声明：“我们一直为了搞笑努力拿捏界线，然而今次明显拿捏失当。本台必须为是次处理不周负上责任。我们相信，搞笑需要勇于尝试挑战冒险，同时亦必须顾及他人感受。试当真谨此致歉，日后定必加倍小心。”
昨晚（17日）的谢票场上，豪哥与游学修进一步解释事件，豪哥将责任揽上身，他表示自己一向讲嘢唔叻，今次用尽分享睇法的Quota去表达，坦言好大压力。他说自己开台早期介绍过一个日本忍笑节目，内有很多恶趣味笑点，自己一直希望有朝一日，调整完尺度后能制作出同类节目，于是今次趁住奥运热潮，举办“忍笑铁人耐力赛”试水温，谁知第一次就滑铁庐。他指：“我初赛嘅时候笑咗好多条片，笑咗十几条，其中一条就系Anson Lo跳舞嘅片，我𠮶阵时冇觉得自己有任何嘲笑成份，我点解笑呢？好难解释清楚，但系我会尝试去讲嘅。”豪哥说很多人指游学修挑衅人、拍具争议的片，但今次其实并非游学修的主意，对方纯粹参赛，冇份参与制作，直至外界声音指试当真好冒犯，也是阿修先开始提出要讨论回应、下架。
豪哥讲到为何会摆Anson Lo跳舞片落忍笑片，绝对并非伤害同业，“推动开拍呢个忍笑节目，同埋一直坚持其实系咪唔需要道歉呢，呢样嘢系我嚟嘅。我认为我摆𠮶段跳舞片出嚟喺会员区，其实系冇触犯到禁忌，亦都唔系想伤害同业、同行，佢唔系伤害同业，亦都冇触犯禁忌，佢只系一个咩笑点，就系承接前面两条片嘅铺排，去制造一个反预期嘅效果而去引大家笑。而呢个笑点最后只系对我，同埋一啲留意到精心铺排嘅忍笑选手有效嘅啫，得会咁样谂多咗一重嘅人先至会笑。”
他解释自己为何忍唔住笑，因为前两段片都是跳舞片，亦有明显笑点，即使并非所有参加者都觉得好笑，但都会清楚那两段片的笑点，“紧接嘅下一段片系咩呢，就系Anson Lo跳舞片，系同前两段片唔同嘅。第一， Anson Lo系冇搞笑动机，佢净系跳舞，唔系出嚟搞笑，第二客观上嚟讲，佢独立嚟睇我系唔觉得有咩咁好笑，亦都系𠮶次笑，我都系第一次睇𠮶条片，我后来知道原来呢条片好Hit。但我𠮶时唔觉得呢条片独立睇咁好笑，点解引到其他人笑系因为大会铺排出嚟嘅反预期，我自己觉得一个笑话点解好笑，就系因为佢铺排咗一啲预期， set up咗个预期，然之后下一秒杀你一个措手不及，违反咗个预期，咁你就好笑。”
豪哥续说自己最初不觉得有道歉必要，即使同事觉得要回应时，最近变得“好辩”的自己也一一反驳，他强调：“同事制作呢个笑点嘅时候，我觉得冇去到心地唔善良，忍笑选手失手笑咗出嚟，我都唔觉得系心地唔善良，但后尾谂清楚觉得我对呢条片嘅拿捏，系我哋拿捏得唔好啰。”两年前他与许贤曾以MC $oHo & KidNey身份唱作《Black Mirror》，讲述镜仔铺天盖地爆红现象，亦曾于《CHILL CLUB》舞台上与MIRROR合唱，豪哥重提这首歌，直言：“基于我咁熟悉《Black Mirror》呢个程度，我觉得自己有信心去判断，Fans们对呢啲可能会冒犯到佢哋嘅笑话嘅接受程度系去到边度嘅，但今次失咗手，其实最后系拿捏唔到啰。最大原因我最近唔系跟得佢哋好贴，写《Black Mirror》嘅时候我觉得都跟得几贴，但系今次有少少甩咗，我唔知条片已经有一啲回响，同埋已经系好红嘅片。”
豪哥透露，新闻出街后都担心Anson Lo会否介意，亦试过联络对方公司，解释自己初心并非如大家所讲要去焫㷫Anson Lo，相信对方会明白，“睇吓有冇机会同佢讲吓，我哋为咗搞笑触碰咗佢可能介意嘅地方，咁我可能都会再向佢讲声唔好意思，呢个唔系我原意。”他认为搞笑很难做到既要踩界，但又不能过界令人难受或感到冒犯，自己原本以为拿捏到，原来计错欢乐指数。
游学修之后亦开腔，他觉得试当真有必要回应，但他未有在Threads群情汹涌时出声，是基于不想引发更多讨论，因为这对Anson Lo、神徒、所有人都冇好处，自己近来正学习不要急著澄清太多事。不过他亦有检讨，觉得会员片标题用上“地狱Level”、“地狱MAX”等字眼，其实只是讲某几条片，不过冇考虑到外间看来会觉得是讲紧Anson Lo。他不想事件发酵得更大，指试当真已有清晰表述，“我哋试当真嘅回复系乜嘢，我哋嘅睇法系乜嘢，我哋嘅检讨系乜嘢嘅，如果后续大家要将呢件事赖到去继续恶言相向去对人哋嘅话，我觉得我会直接当𠮶啲唔系我哋嘅fans。”他认为若有人不认同试当真的解决方法及回应，继续去开战也无人得益，并谓：“我一直做嘅嘢嘅言行，令大家一直对试当真有啲观感，我都有检讨，好多矛头指咗落我度，我尽量去take或者唔take，同埋唔澄清。”
他及后提出一个建议，就是他Cosplay Deadpool跳一次《Hey Hey OK!》，“但我要揾一个人教我，好认真学只舞然后跳一次，大家无数啦，打和啦，好唔好啊？ Peace。”又表明：“我冇可能跳得好过Anson Lo，但系我可以认真跳一次！”短片播出后，不少人留言认为豪哥回应得体，但亦有不少Fans认为冇必要道歉，质疑他们为何要“跪低”。