港视获发牌《选战》《警界线》有望拍续集？ 王维基：编导去晒TVB

由王维基揸旗的港视昨日终获政府开绿灯，获发流动电视牌照，等咗几年以为“一男子”换上“一女子”有突破，之但系呢个牌照复杂到爆，甚么DVB-T2制式、甚么数字视频广播一大堆难明术语，重点系……究竟我睇唔睇到先？

其实好简单咁讲，就系喺电视机好难睇到，用app或者上网就睇到，点解会咁？再简单嚟讲就系港视主席王维基首次申请牌照失败后，2013年向中移动购入流动电视业务，但要在港经营需要向通讯局申请，王同时再度申请免费电视牌照，如意算盘是两者兼得就天下无敌，可惜事隔4年，所谓开绿灯其实只系得流动电视服务过到关，所以屋企部电视睇唔到。

放长啲双眼睇又点呢？政府仲有机会开埋另一盏绿灯批埋个牌俾王维基，我哋系咪就有机会睇到《选战2》、《警界线2》或者《导火新闻线2》呢？

《香港01》致电王宗尧，佢认为获发流动牌照是：“好事嚟！再睇下点。”问他会否有机会再为港视拍剧，他就回答：“都想拍嘅！到时睇下王维基点倾。”

不过港视自从2014年转型开拓网购市场后，不论演员、编导演均采取自然流失制，王维基透过发言人回复：“有一半编导去晒TVB啦！其他要等适合时再公布。”意即再开剧有困难。

有现任港视高层则透露：“就算政府而家批埋个免费牌出嚟，港视嘅商业模式都变咗，加上做咗网购3年一直蚀钱，最近啲订单至多番同埋稳定啲，但王生资金少咗，网购未赚到钱，佢已经冇以前咁多钱，边有钱拍剧！”他又指如果只靠流动制式，就算拍剧都唔会一个钟一集，可能得十几分钟一集以减低成本，而且编审、导演有一半已回巢TVB，肯唔肯再为王维基打仗实未知之数。

好似《警界线》编剧朱镜祺已返回无线，早前大热的《不懂撒娇的女人》便是他作品，至于《选战》导演黄国强，已被刘德华旗下公司招揽为其制作剧集《香港华尔街》，睇嚟短期内无望为港视服务。