吴家忻被封“准百亿新抱”未感压力：师傅话我啱迟婚

吴家忻（Kayan9896)今日（13/8）现身北角出席Viu原创剧《同居少女诸事卜》试映会。对于剧集背景故事以时下流行的占卜为题材，Kayan接受《香港01》访问时表示：“其实以前唔系好信风水命理嘅嘢，好多嘢都系信自己。但好记得拍呢套剧嘅时候，每日我都上齐香开工，但就系有一日太过匆忙，我忘记咗开工上香拜神。到我喺马路边拍戏时，我唔知点解撠脚突然成个人跌咗落地，仆到只手损晒，意外发生咗之后，我觉得成件事系好巧合，令到我相信有啲嘢系一定要做。”

被问到有否揾师傅算命？Kayan表示：“之前妈咪都有叫我去试吓问问，我系有揾到师傅睇过，我都觉得有啲嘢都讲得几准，例如话我唔适合做白领工作，话我适合做演艺事业。（有冇算过姻缘？）我都有算过呀，师傅就话我啱迟婚，如果早结婚就唔系咁好。（自己想唔想迟婚？）其实迟婚都好，因为现代女性嘛。不过以前细细个拍拖嘅时候，都好想结婚，但当每分手嘅时候，就会谂好彩冇结婚。（想几多岁先结婚？）好似套剧入面个角色咁，三十几岁先结婚。（被封“准百忆新抱”会否好大压力？）又唔会嘅，始终两个人拍拖，我就撇除呢个名嘅，其实就冇压力嘅，开心就一齐，夹就一齐。”