林凯恩未想过与郭嘉文搞生意：都系希望身边闺蜜发达完后包养我

有样有演技无线小花林凯恩（Iris）凭无线处境喜剧《爱·回家之开心速递》中“Bonnie”一角成功入屋。不过去年有传因扭计拒续约无线惨遭被调离《爱回家》，改为主持资讯节目《流行都市》，而且在其他剧集演“跑龙套”，令网民大感惊讶，有不少网民替她不值留言：“佢值得更多，留系到都冇机会发展，咪走人啰”、“觉得佢几正 ，出去拍啦大把世界”、“做演员好难挨冇保障”。

今日（13/8）林凯恩现身将军澳电视城出席《爱·回家之开心速递》宣传活动。被问到会否仿效闺蜜郭嘉文开美容院创业做老板，为自己将来铺路打算？林凯恩接受《香港01》访问时表示：“其实自己一路都揾紧到底有咩适合自己，而且我亦太了解自己好容易三分钟热度，好怕买晒啲嘢返嚟之后，又会放弃咗。（你喺呢行都好耐，冇放弃过！）哈哈，系呀，喺呢行我系冇放弃到。因为觉得适合我自己，可以对到唔同嘅人，所以觉得好开心。起码又可以听到唔同嘅人嘅故事，又可以扮靓呢个都系我自己最钟意。”

问到会否为将来打算作两手准备？林凯恩笑言：“其实都努力揾紧，同埋物色紧。（物色紧有钱男朋友？）哈哈，我都系希望我身边嘅闺蜜发达完之后可以包养我。（点解唔同闺蜜郭嘉文一齐创业？）我都系钟意返友谊上，我哋系会互相鼓励多过于喺生意上面。始终都会担心一齐做生意怕会有拗撬，而影响之间嘅关系，所以我都系喺佢背后支持佢就足够，听吓佢呻吓开心过一齐搞啰。”