女神连登公开痴男追求whatsapp　简淑儿：最好方法都系block咗佢

有人话追女仔好简单，不外乎靓仔、靓仔同埋靓仔，若果不是靓仔，咁富二代都一样煞食，但若然本身其貌不扬，荷包又长期干塘，追女仔当然难度倍增，不过又不要睇到香港女仔如此现实，风趣幽默都可以加到不少分数，但就切忌死缠烂打，近日网上有位巴打被女神公开追求Whatsapp内容，虽然被女神多次拒绝，仍然心口挂个勇字一味死冲，最后当然是阵亡兼且被放上网鞭尸，值得一众巴打引以为鉴。

相信不少人也有过追女仔的经验，以前会写情信、MSN，近年就Whatsapp都可以示爱，仲可以加埋Emoji，威力大好多。但文字传情的缺点，就是随时会被女神Cap图放上网，供广大网民耻笑，近日就有近似情况在网上发生，开首大家都好同情女神，觉得她受到痴情男滋扰，甚至有丝打身同感受，表示曾经被追求者烦到癫，亦有人提议女神Block了对方，让男方死心。但之后发现女神竟然将兵仔由5月至7月的Whatsapp内容，全部放晒上网，而且不断更新，不少人亦由力撑女神，变成觉得女神有点过份。

同是女神级数的简淑儿，知悉该名女网民跟兵仔的情况，连她也不撑女方，“我都觉得佢冇乜品，其实系唔好㗎，始终人哋私隐嚟，唔知个男仔会唔会handle唔到，虽然个男仔都唔啱，但某程度上都会带俾人伤害，同埋post咗出嚟个男仔又唔会唔揾妳嘅。”简淑儿表示自己也有遇过追求者，拒绝过后如果对方仍继续死缠，她会选择Block了对方，所以她建议女事主，“最好嘅方法都系block咗佢啦，对大家嚟讲都系好事，等佢唔再乱谂嘢。”

在该名网民的追求Cap图中提到，要约女方出来讲清楚，被直接当面拒绝才会死心，简淑儿就说千万不要单独见面，“隔住个电话佢都唔听，出到去见面，更加唔会听妳讲嘢，佢咁激进嘅话，女仔都系尽量唔好出去，又唔系真系好熟，就算真系要出去都一班人去，但妳出去可能会俾多咗个幻想佢，佢又会觉得可能有机会㖞。”但亦有男仔觉得追女仔要花点时间，无理由追两追就自动投降？“其实Feel到个女仔对你有啲鼓噪嘅时候，就应该要停啦，就算唔令个女仔钟意你，都唔好令佢讨厌你啦。”各位兵仔留意啦，要出击就要睇准时机，一味得个烦字冇用的。