软硬自封“灵堂级组合”　林海峰自爆驾车时爱焚机听老婆歌曲

《拉阔音乐会 软硬广播道3号FANS杀人事件》前晚（3日）喺亚博举行，软硬出场后由头跳到尾近两小时，嘉宾除有Kiri T、张蔓姿、moon tang、云浩影、草蜢外，受伤后嘅Eason 陈奕迅亦压轴登场，同软硬一齐唱《老人苑》及《重口味杀人事件》，而最后903 众DJ上台合唱《Encore 》。

林海峰、葛民辉完骚后齐齐接受访问，林海峰表示完成任务十分开心，但亦话“一场够啦，要休息一段时间”，阿Jan 在台上不时照顾葛民辉嘅走位，又提醒他要入歌，十分好笑，葛民辉笑言“恩爱就系咁”，阿Jan紧接自爆自己都记错位。“因为佢一走唔知走去边，我捞唔返佢仲惨，好似睇实啲细路仔咁，将来都到佢睇返我，其实互相睇，从来都系咁。”

阿Jan又表示今次系以“灵堂级组合”挑战“殿堂级组合”草蜢，其谓细细个认识对方时，已不时睇住佢哋嗌交。“好似家变咁，但变完又喺埋一齐，佢哋系唯一队组合嗌交、翻脸最多，但转头又系最好最合拍嘅组合。”Jan又话自葛民辉离开商台后，二人不时经常见面，所以连嗌交机会都冇。

讲到另一位“殿堂级”嘉宾Eason ，Jan透露早在去年自己开骚时已问对方，他无谂过Eason 会感兴趣，而直到意外后，Jan亦无刻意揾对方，更无准备任何plan B，因为无别人可代替，幸好Eason最终能现身。阿葛表示Eason 十分痛锡Jan。“佢有私下揾我，话康复得几好，但唔敢保证，‘会练下、应该无问题，唔好话俾Jan听’”

音乐会其中一节，由Jan 读白多个经典广播剧内容，再由云浩影唱出主题曲，其中一句是“现实中郭富城系无同彭羚一齐”，他自揭本身有几个版本，包括“现实中郭富城系同方媛一齐”但为怕搞乱，所以才收埋此版本。问到是否好耐无听《未完的小说》，他即话：“唔系，我不时喺车上焚机，车女嘅时候会开俾佢哋听。（有无谂话揾老婆唱返？）佢好忙，佢期表好紧凑，又要上堂教学生，教完返嚟都差不多灯灭，我而家灯灭时间愈来愈早。”而对于有指《早霸王》要让路65周年台庆广播剧《微凉之夏》，Jan亦有解释：“个电台系大家嘅，系整体嚟睇，好似今晚话系软硬骚，但无其他节目又点会完整，电台系广播、系听众。”