【任噏乱评】动物传心好鬼流？　几个著名成功例子吓亲你

最近有单新闻讲动物传心，用一只喺淘宝廿几蚊就买到嘅胶龟，当众踢爆几个声称自己有几乜乜物物认可嘅动物传心师。香港人睇人尴尬最开心，有唔少人睇完条片，都话睇住传心师呆咗个样真系好好笑。不过当然喇，动物传心呢家嘢，就系因为新闻实证咗唔work，所以都系睇完吓一跳，然后得啖笑。之但系谂谂下，动物传心乜真系唔work咩？唔系㖞…真系有几个著名嘅动心传心成功例子，到而家仲脍灸人口㖭㗎㖞，好多人仲好buy。不如讲下呢几个case，你哋睇下系咪咁坚喇！

惊世例子：杨过与神雕

我敢讲，如果冇神雕，杨过应该闷死咗。自从小龙女堕崖之后，“如何面对，曾一起走过的日子？”好在有神雕！至少唔系一个人傻下傻下咁过日晨，个套玄铁神剑都系杨过日日同神雕对打咁练成，打到杨过以“雕兄”称呼，简直情同手足，好励志感人。你话神雕识武功好鬼劲？我就觉得杨过仲劲，如果唔系识读心，只雀用剑发来发去我真系识条铁咩！所以话，呢个case真系举世闻名，杨过就系咁样成材！

震惊13亿人：唐三藏与徒弟

睇西游记，其实除咗天庭嘅人同唐三藏，其他角色几乎都系动物，就算孙悟空同猪八戒，唔好忘记同埋唔好畀佢哋呃到！佢哋都只系马骝同猪嚟，只不过系拟人化咗啫！唐三藏真系好劲，除咗可以同动物有正常沟通之外，孙悟空曳曳唔听话？喃呒喃呒咁念紧箍咒，呢招真系动物传心嘅最大技呀！仲唔系最佳例子？

贴地例子：黄子华同小强

黄子华都识动物传心术㗎！佢同小强称兄道弟，仲用个玻璃樽装住，好似住紧豪宅咁㗎。虽然隔住个樽，但都无阻佢读心嘅能力，晚晚同小强吹水都得，friend到黄子华都要出返首歌，歌颂佢大佬…“人强不需要马壮，不需要包装，我有小小强～”

西域例子：龙母与龙

有睇《权力游戏》都知，龙母真系当代代表女性，除咗有样有身材，仲可以掌控巨龙，呼之则来，挥之则去，仲成日骑住条龙周围走。咁又系嘅，都可以统帅万军啰，有咩理由连条龙做咩都唔知先？识读心㗎嘛！好似系。