【DSE放榜‧任噏乱评】明星路似考试　陈伟霆音乐肥佬转读戏剧系

DSE放榜，每逢呢个大日子，网民都好钟意拎返当年E-kids三个人嘅会考分数出嚟讲，因为佢哋夹埋系“不多于5分”，有次访问见到E-kids同佢哋提起呢件事，佢哋笑笑口同我讲：“边有5分啊，网民真系太擡举我，其实我哋3个夹埋系得1分咋！哈哈哈哈哈哈”政府成日叫我哋要“求学不是求分数”，我谂佢哋就系最好嘅例子。今日DSE放榜，无论几分都好，其实分数真系唔系最重要。

点解咁讲呢？我唔直接去答你，用例子答，好似香港乐坛咁，周柏豪离开合作咗10年嘅华纳唱片签TVB星梦；而TVB亲生仔许廷铿又由星梦跳出嚟去华纳，听落佢两个就好似“交换学生”咁，又啱㖞，如果将乐坛嘅唱片公司比喻做香港嘅大专院校，DSE考生比喻做艺人，艺人同边间公司签约其实同考生读边间院校一样咁重要，因为真系好影响以后条路点发展。

TVB嘅星梦娱乐就好似IVE（香港专业教育学院），IVE系职业训练局成员院校，入去嘅Artist个个都好似去咗十八铜人巷咁，唔会好似其他公司咁揾老师同你上堂，系畀好多实战机会你，可能畀你主持吓节目讲音乐去旅行，又或者客串吓八点半九点半剧集，再唔系就谷你狂唱主题曲入屋洗大家脑，大台总有各种机会畀你锻炼，绝对唔怕冇工开，最怕你顶唔顺咁Chur，好似许廷铿就系一个成功嘅例子，出咗好多只碟、唱咗好多只主题曲，电视剧同电影又参与过，就连演唱会都开咗好多次，学满师之后要跳糟都大把人要，华纳唱片即刻就签咗佢，虽然TVB嘅星梦娱乐同IVE一样，畀人感觉个名好似唔够威，但其实佢又有佢嘅优点，够晒Practical！

华纳唱片公司就好似香港大学咁，校友粒粒都系天王巨星，刘德华、郭富城、郑秀文、林忆莲、甄妮、陈百强等等，真系星光熠熠，个个都唱功到家，咁点解柏豪入咗港大都要转去入IVE呢？柏豪出道到依家，由《六天》、《傻小子》、《够钟》，唱到《我不要被你记住》、《Smiley Face》、《只有一事不成全你》、《无力挽回》，到佢后期结婚嘅作品《我的宣言》、《百年不合》、《有生一天》、《终于我们》，真系首首都红到核爆，差唔多首首喺YouTube入面都成千万点撃，算喺“First Hon”毕业。转去星梦可能就系因为要再进修，进修乜嘢？就梗系演技啦，其实都叫有迹可寻，今年柏豪有份拍重头剧《使徒行者2》，仲要系做同陈豪、袁伟豪孖住做主角，依家仲入埋星梦，睇嚟柏豪嚟紧都会疯狂拍剧同唱主题曲㗎喇。

华纳唱片真系好多巨星校友：

香港乐坛同教育界一样百花齐放，咁多间学校同唱片公司，总会有个选择适合你。咩话？考得唔够高分，喺香港报唔到心仪嘅学校，不妨谂吓海外升学，唔好畀香港局限自己。就好似宇宙G.E.M.（邓紫棋）同Angelababy（杨颖）咁，香港星路唔系咁顺畅，但北望神州之后，两个人都红到发紫，身价十级上，香港观众唔钟意阿G.E.M.“儿夜姨野以夜仪野”，内地歌迷就钟意到不得了，baby喺香港畀大家弹佢个样太“人工”，唔紧张，大陆个个整容都要照住baby个样嚟整，正所谓条条大路通罗马，最紧要拣一条啱自己嘅路。

除咗要拣啱学校之外，拣啱科都好重要，记得陈伟霆11年前新秀出道同英皇签约，英皇力谷佢做偶像歌手，但都冇乜起色，跟住唱《Taxi》太胶仲畀人笑佢系“的士陈”，连黄晓明都加把嘴话：“而我不知道陈伟霆是谁。”把心一横William北上拍剧，第一部剧同阿娇、杨幂一齐拍《古剑奇谭》已经小有名气，之后拍完《少年四大名捕》同《老九门》之后，喺内地红到震，年收入已经过亿，由音乐系转做戏剧系系佢做得最正确嘅选择。

轻松吓啦，DSE遇上挫折绝对唔可怕，因为人生仲会有更多挫折等紧你去面对同克服。