伍家谦解释取得奥运独家访问潜规则　爆竞逐方法：畀钱最简单直接

巴黎奥运开幕后，除了赛事及运动员外，传媒及记者的访问报道也是焦点之一。各电视台都有派员去现场直击及采访运动员，日前何振然取得独家访问机会，访问女子重剑金牌江旻憓准备充足，快速而精准地问中重点，更顾及到江旻憓刚比赛完的心情，一致获得外界赞赏。不过对于为何个别电视台能够进行独家访问，亦引起不少网民关注及讨论。

对此，香港无线电视新闻部体育组前首席记者伍家谦昨晚（29日）就在Instagram攒长文详细讲解奥运采访的经历及如何获得独家访问：“网上见到有人问，点解有啲台可以做独家访问先？喺呢个问题上面出现好多猜测：系咪夹硬夹走个运动员呀、系咪个受访者自己拣呀、系咪有指定要答边个先呀……睇完先醒起，呢啲有关采访同制作嘅嘢，一般市民大众未必知道；与其估估下，咁啱小弟又现场采访过两届奥运，就一于当做冷知识咁写下。奥运嘅采访，有规有矩，不得乱来。边度可以拍片、边度可以影相、边度做得访问，全部清清楚楚；有啲地方影得相唔拍得片，而斋做文字访问嘅区域就直头连摄录器材都唔攞得出嚟。如果喺唔适合嘅地方拍嘢，影咗都唔出得，因为会畀国际奥委会告；轻则口头警告，重则取消成届嘅采访资格。(真系发生过)”。

伍家谦指奥运采访规矩非常复杂，简单来说，一个比赛场馆入面惟一合法做访问的区域叫做“混合采访区”(mixed zone)，所有完成比赛的运动员是必需经过这个区域才能返回入后台更衣室，至于是否停低接受访问的选择权就落在运动员手上：“试想像下，超级体坛巨星，全世界记者都想问；如果个个都答，佢可能行一世都未走得出个mixed zone，膀胱爆埋都未返到去验尿做药检，所以，佢哋多数会选择答头几个、有啲见到相熟/嚟自自己地方嘅记者就停低、有啲做完一定要做嘅访问(下文会讲)就直行直过。(所以点解我咁崇拜费达拿，佢真系逐个逐个记者答。伦敦奥运𠮶阵佢喺我前面行过咗，本来以为要食白果，点知佢答完下一个记者之后走番转头笑住话：‘Sorry呀头先miss咗你，你有咩想问呀？’😍，呢个级数嘅运动员，真系得佢会咁做)”

采访排得愈前就愈著数，而排第一的一定是国际奥委会的频道，而且规定了运动员一定要回答，排第二的就是主办城市的国家官方电视台，例如伦敦奥运是BBC、北京奥运就是中央台。至于之后的排位就开放自由竞逐，竞逐方法有两种：一，畀钱；二，斗早：“畀钱最简单直接，只要肯科水畀国际奥委会，个位几靓都有。入面光纤电掣乜都齐，而且只有你一间专享，其他人想入都唔入得；服务同价钱成正比，所以有意买位嘅电视台会系事前plan定，边个场馆最有机会攞奖，边个运动员一定要问到唔可以甩，先至决定畀钱买𠮶个场馆入面嘅mixed zone位。”

至于一些预算较少，又或者肯畀钱但抽不到名额的电视台，就只能够叫队crew早点入场，希望霸到较前的采访位置：“𠮶啲位一定会排喺畀咗钱嘅人后面，都真系几后下；又因为𠮶度所有记者都入得，乱起上嚟系会同打仗一样，迫到飞起。其实行到嚟到呢度𠮶阵，个运动员可能已经答咗同样嘅问题几十次，一般好少停低 不过，我哋嘅运动员系好好嘅，见到香港记者，几乎一定会答；下次睇访问，大家见到有台一个人单头问先，有啲就几十个咪牌堆埋一齐，大概就知咩事。”