独家│前微辣阿妹思男重新出发　转做幕后：我依家系边个啫

2023年7月26日，微辣前经理人阿晶自杀身亡，她生前疑似受情绪病缠绕4年而选择轻生，而这次的事件亦令微辣停止营运。被网民指是始作俑者之一的叶思男（思男），去年9月在社交平台撰长文宣布跟微辣完约并剖白自己的感受，当时她更形容那几星期“是人生最黑暗日子”，连走出街都怕被人破口大骂。

事隔一年，思男亦重新出发，她接受《香港 01》独家访问时表示已经转工：“最近出咗嚟做嘢啦，系香港做啲关于marketing，event嘅公司，我本身都系呢一科毕业嘅！咁我依家都做得好开心啊，又有机会同其他brand去合作，只不过系换咗个角色，咁我都觉得好开心嘅！”被问到是否因为去年“阿晶事件”而令她转行做marketing时，她斩钉截铁表示绝对是：“绝对有关系，因为我唔会再等任何机会，即系我会想自己争取去做一啲我认为我适合做同埋我可以做嘅嘢。咁之前做𠮶行同埋发生𠮶件事之后都令到我学到好多嘢嘅，唔可以再靠人或者唔可以再信人，系一定要信自己。”

思男被问到今时今日还有跟微辣的人有联络吗？思男则说：“少啲啰！”而发生“阿晶事件”后，他们有没有坐下来谈一下到底是什么原因导致愈演愈烈？思男说当时他们没有一起谈过：“我冇专登同公司去倾嘅，因为我觉得已经过咗要倾嘅时间啦，之前有倾过，但佢同我嘅共识都唔系好一样，变咗我觉得好似冇乜要倾嘅余地。咁佢哋一切嘅决定啦，依家我都冇办法去畀到意见啦，同埋我都唔会畀意见，咁我依家尽量focus系自己身上，可能增值多啲自己啊，跟住之后做啲可以令到我开心又帮到人嘅嘢。”

思男对于离开微辣，都有感到不开心：“你话冇唔开心就假嘅，咁但系其实我自己都会同啲朋友讲话呢间公司嘅员工我系好钟意嘅，佢哋其实系好单纯嘅，咁但系佢哋所做嘅所有决定或者决策有冇做错呢，又或许系咪最岩呢，我唔评论啦。”思男更说访问现场也有一些以前微辣的同事在场，她续说：“咁我都好开心依家可以仲会见到佢哋，仲会一齐做嘢。”

至于发生“阿晶事件”后，不论网民还是路人都对他们不断责骂，他们又如何去消化这一件事？思男就希望大家先了解再作出批评：“我会好希望佢哋亲身认识咗我呢个人先去对我呢个人做评价啦，即系我讲咩都未必系佢哋想接受同想听嘅嘢，所以我会同自己讲话唔紧要啦，佢哋唔识我系咩人，咁佢哋咁样讲都系正常嘅。但我会好希望，譬如啲人DM闹我，依家仲有好少啦，但系当然好多鼓励我嘅人啦，咁闹我啲人有时我都会痴起条筋我覆佢哋话，其实你都冇真系认识我个人，你净系听网上面啲嘢你就觉得我系咁嘅人，咁你都未认识我，你咁样讲究竟系为咗啲乜嘢。即系点解你要咁样讲呢，同埋你唔钟意我又要睇我嘅时候，你会唔会令到你自己唔开心，反而系叫佢哋，如果你真系见到我唔开心。真系唔系串咁样讲，顺粹系我系为佢哋好，如果你见到我系唔开心想闹嘅话，咁不如你令到我系你嘅世界上消失啦。即系你唔好睇我啲嘢亦都唔好关心我，咁你自己可能仲会过一个好快乐好开心嘅人生。”

思男被问到她这样回复网民，怕不怕会引起骂战？她表示不想：“我唔会想引起骂战，同埋我都唔会同佢哋对骂啰，即系我你一个好平常心咁同佢哋倾计。即系讲真我依家系边个啫，都唔会当自己系边个，不嬲我都唔会当自己系边个，佢想认识我，想了解我，我随时欢迎佢哋去咁样做。”至于现在的思男退居幕后做marketing的工作，被问到会否想再走出来做幕前时，她表示暂时没有这个打算：“但系唔知之后会点，暂时都会系专注系marketing同埋搞event嘅身上，因为我发现做呢啲嘢，策划呢啲嘢都会令到我好开心，同埋令到一件事成功咁发生都系好满足，咁样已经够。”