郑秀文邀周殷廷任嘉宾　大赞YT音乐旅途奋斗史：好彩你捉紧信念

“You & Mi 郑秀文世界巡回演唱会2023”（Rescheduled ）昨晚（21/7）去到第8场，嘉宾有YT大哥周殷廷，原来YT除咗系第一次喺红馆唱歌外，仲系首次做演唱会嘅嘉宾。Sammi问现场观众：“有冇听过周殷廷嘅《三生有幸》？呢只歌Hit到爆！”然后她对YT说：“多谢你接受我嘅邀请。你喺音乐旅途上嘅奋斗史令我好感动，我欣赏你锲而不舍、为咗自己嘅梦想好努力，虽然中间你几乎想放弃，好彩你捉紧信念和机会，所以人生真系柳暗花明又一村，永远唔好放弃，机会就在眼前。”

Encore环节，Sammi发现观众席有一位小男生献花，立即上前，然后她惊喜大叫：“佢哋系我平时买菜嘅菜档老板一家四口，我请佢哋嚟睇，真系嚟咗，好sweet呀！”她接过花束后说：“去帮衬吖，跑马地菜档。几惊你哋唔嚟，我千叮万嘱，第一二行架，唔好畀人呀！你哋真系嚟咗，我好开心，多谢你哋！”她又笑言现在生活变得师奶，不再逛街买衫，而是逛街市买𩠌。

完场后，Sammi衫都未换就立即跑到红馆外，为过百位守候的歌迷签新唱片《SOUND OF MI》。为吸引偶像注意，歌迷各出奇招，有人送上薯片零食，亦有人高举写住“想你签个名”纸扇，Sammi有求必应，更跑匀每个角落跟歌迷挥手和鞠躬致谢，场面热闹。