张文慈为揾食穿州过省唱夜场　曾感被羞辱︰好多人摸过自己身体

张文慈（Pinky）日前接受汉阳主持的《诗歌有Guide》节目录音访问，于2010年信主的Pinky是一名虔诚基督徒，大谈入行前后遇到的各种经历，当中更有多次惊险场面，有次更感到羞辱：“你谂吓畀几多人摸过我个身？””

现年52岁的Pinky于96年选亚姐入行，她在节目中向好友汉阳透露，指自己入行前曾做过模特儿及特约演员，“即系跑龙套、茄喱啡，当年拍好多卡啦OK，又喺好多电影入面做特约演员，好似《Beyond日记之莫欺少年穷》讲黄贯中抄我牌，仲有《开心鬼放暑假》都有份，但都系一、两个镜头。”之后Pinky去了日本和美国三藩市留学，完成学业便返港参选亚姐。

Pinky入行不久便拍下《纵横四海》、《我和僵尸有个约会》系列、《情陷夜中环》等多套经典作品，同时参与不少电影演出，性感造型令人留下深刻印象，而Pinky首部拍摄的电影《黑狱断场歌之砌生猪肉》便是与影帝梁朝伟合作，她忆述当时紧张得不敢直视对方，“第一次拍电影惊到吖，我仲记得导演闹我‘你望住佢对眼做戏呀’，梁朝伟只眼我点敢望？我惊到唔敢望住佢对眼。”

除了影视工作，Pinky亦经常穿州过省四出登台，期间遇过不少惊险事件，令她犹有余悸。“有年生日喺夜场登台，唱唱吓歌老板推个蛋糕出嚟，全场同我庆祝，握手期间我畀人扯咗落台，当时着咗一条低胸露背裙，一仆向前就跌咗落人海里面，好多只手兜住我，托返我上去，你谂吓畀几多人摸过我个身？”汉阳笑称：“个场面好香艳！”Pinky续说：“我都唔知喊唔喊好，但人哋又唔系特登，只系好羞辱嘅感觉，最后都硬住头皮唱埋落去，一半惊险又一半开心。”

另外一次惊险事件发生在多年前，Pinky乘坐的车停泊在路边，一辆车突然打横阻档她的车，“原来架车跟踪我哋，好彩有两个交通警咁啱坐咗喺路边，𠮶架车见到两个警察，即刻开车走，如果唔系𠮶两个警察，我可能已经畀人捉走咗。”

Pinky亦被汉阳追问感情事，但她强调自己的感情生活5只手指数得晒，“入咗行后都系2、3个，我以前好执着架，好介意同好惊畀报纸写，好惊有唔好影响，但依家咁大个冇乜所谓；信咗主后，唔会再为拍拖而拍拖，呢个年纪想揾个伴多啲，心态好随缘。”Pinky更大爆早年曾雪卵，“以前细个好恨结婚生B，但依家唔会，我都唔细啦，揾男友揾老公条件同后生唔同，曾经有想过要小朋友，仲雪咗卵，但都好多年前，依家都唔怕讲，唔可以为咗结婚夹硬揾个人去生，依家已经放弃呢个念头，一切交畀主，因为上帝早有预备。”