欧锦棠爆娱圈龟婆有本簿标明女明星接客价　自己亦曾被邀做牛郎

欧锦棠近年开设YouTube频道“乜乜棠水舖 The Stephen Au Show”，最新一集就分享娱圈秘闻，他说是桃色新闻，其中一单是圈内同事告诉他的，另一单则是自己亲身经历，又表示：“呢个世界有好多人贪慕虚荣，唔系讲紧艺员贪慕虚荣，系外面啲人贪慕虚荣，觉得你作为一个艺员、演员，可以同你有啲关系，正所谓有一腿，佢都好似叨咗光咁。”

他先说第一单，指这位主人翁分别做过两个电视台，是选美出身，不过落选就退居幕后。由于此人熟悉选美流程，所以亦主力负责选美节目的幕后工作，担当照顾佳丽的“褓母”。欧锦棠形容：“佢揸住鸡毛当令箭，对人呼呼喝喝，直至后来佢去咗艺员部工作，都系对一啲冇名气嘅艺员，好似闹狗咁闹人，一啲情面都唔畀，好侮辱性，好多艺员憎到佢死！”

而她的另一个职责，是介绍女星被“老板”认识，告诉新入行的女艺人要多去识人，这样才会有机会，叮嘱她们打扮得漂漂亮亮去饭局，有部份人更有利是收。他续说：“去到点样呢？一个女同事就坐一个老板，因为唔系明刀明枪嘅买卖，啲女同事都不知就里，所谓嘅老板个个都客客气气，你话用把口食吓豆腐，在所难免，有冇郁手郁脚呢，啲女同事话冇嘅。席间倾吓偈，佢周围喺度打点，食完饭就会分开晒啲女仔，乜公子会车你返去，又叫你跟阿边个返去，夹硬推人上车，其实系一个讯号，食完饭沟通好，有咩我睇唔到，你哋上车倾掂数就系咁 。有女同事唔肯就范，就冇下次，甚至乎会闹佢冇家教！”欧锦棠形容这个女人，简直是《水浒传》的“王婆”，是一个“龟婆”。

欧锦棠指自己曾听闻有同事说，曾经见过一本簿，上面写了很多女同事的名字，每个名字旁边都有银码，他明白这行确实有少数女艺人是“出嚟捞”，但亦有很多女艺人是乖乖女，“但总之唔理，写咗个名，隔篱有个银码，你唔知外面啲客有啲所谓Taste，佢系要揾你，你都要报个价先，报咗价先落嘴头再睇下个女仔肯唔肯。有啲咁嘅人做啲咁嘅嘢影衰呢行！所以佢去到边衰到边，去到边，乞人憎到边！”

而另一单见闻更是出现在欧锦棠本人身上，他说自己当时做《今日睇真D》赚了第一桶金之外，名气也好好，有日接获一位曾做演员的前辈致电，对方说有老板想找他拍广告，约他去铜锣湾一间有名的日式料理餐厅见面，自然不以为然。去到餐厅时，欧锦棠只见该位前辈独自一人，他说：“佢话老板一阵间先嚟，讲讲吓佢就话‘阿棠，你有冇听过‘Friday’？’我真系唔知呢样嘢，佢后尾先解释畀我听，源自于台湾𠮶边，好多男仔返工返一至五，礼拜五晚就做牛郎，即系男版嘅三陪，喺夜店做陪客工作𠮶啲就叫‘星期五’。我一听就呆咗，我𠮶时太天真、太后生、好纯，我仲谂好彩老板未嚟，佢听唔到咋，佢就动之以情利诱。佢话，我唔问你揾几钱一个月啦，虽然你做得好好，但系你谂吓，我哋有网络、有人脉，喺九龙塘有啲私人地方同架步，你真系唔需要做啲咩，你唔需要谂到咁差，其实呢样嘢都唔系咁差嘅嘢，好正当，纯粹社交，同客人饮下酒，唱吓歌，倾吓偈，就系咁咋嘛，你唔好谂后面嘅嘢，你有冇后面嘅嘢我唔理，呢啲纯粹你个人嘅嘢，你净系做前面𠮶样嘢，不出三个月你可以买波子，买Benz，一定得！”

然而，欧锦棠对买车却冇兴趣，果断拒绝：“我唔会做呢啲嘢，冇得倾！”其后“老板”终于现身，是一位日本女士，欧锦棠指对方的目光冇离开过自己，他后来才恍然大悟，“老板？你老板！佢系嚟睇版，睇吓啱唔啱样。”接著他立刻拍台走人，怒睥对方兼走人，令在场的二人都十分愕然。