【警讯】恶搞郑嘉颖《铁马寻桥》经典惨叫 奸人坚哥:导演杰作
当有人闹本土电影《今晚打丧尸》如果要cult请cult到尽,另一边厢,港台节目《警讯》切切实实示范甚么是“Cult之巓”。新一集《警讯》讲到公众地方的猥亵行为,以及入房爆格这两个普通题材,导演再一次突破cult片新境界,要玩一于玩到尽。令本来题材严肃的《警讯》,充满幽默感,网民睇完不禁睇到拍手赞好。
讲到公众地方的猥亵行为,虽然用out爆、而家90后后生仔都唔会玩嘅“真心话大冒险”(True Or Dare)入题,但你有冇谂过《警讯》会咁?冇!其中一人玩游戏输了就要在沙滩上赤裸行走,系就系低成本少少,明眼人都知打咗格都唔会掩饰到条肉色底底,只不过呢个根本就系发挥cult片的精神,成本低都会照做,最紧要大家buy!系就系几搞笑,但至少观众睇完、耻笑,都get到做人千祈唔好咁傻,爆下自己大镬咪算,何必要野外露出呢?
话题一转,就讲到偷窃。这个话题由盘古初开都发生了不少次,《警讯》讲到口水都干埋,但系骗徒手法层出不穷,导演个脑都系,所以今次唔玩老正,恶搞一下。大家都好熟悉的御用奸人坚哥又出场,毫无悬念地又再做奸人。今次他饰演速递员,揸住电单车出场,谁不知一除头盔后,坚哥爆咗句:“3条45个0,Call我吖!”原来系扮紧郑嘉颖!网民大赞呢个look好有诚意,睇完即刻“噗”一声笑出嚟。
未完㗎!未完㗎!后来坚哥走入屋爆人格,屋主返到屋企,见到一片混乱,首先抱头,然后忍唔住崩溃,大叫:“啊!”一次都不特止,仲要加多几个倒镜…咦,点解咁熟口熟面嘅?《警讯》再一次向郑嘉颖,兼且TVB致敬,将《僵》加《铁马寻桥》…“人在远方,蝉没有和唱…啊!!!!”真系好有画面,完全融合埋一齐,导演今次放大绝,超晒班。事后问到“御用奸人”坚哥,他就大赞:“导演杰作!”问到坚哥知唔知自己扮紧郑嘉颖,他非常可爱地说:“我而家先知咋!”但郑嘉颖似乎是导演的灵感来源㖞!坚哥话:“啲桥佢谂嘅,可能系都未定。”《警讯》越拍越大胆,尺度好似无限向上开拓紧,坚哥就好有信心,表示:“又唔系拍三级!”