李佳芯被爆与新欢低调撑台脚　开腔回应绯闻：多谢咁关心我嘅感情

视后李佳芯（Ali）自2020年与拍拖7年的陈炳铨分手后，除了曾传被“虫草大王”力追之外，2022年曾被影到同一名男士同游日本，但当时她否认恋情。不过相隔1年多，日前李佳芯被爆与疑似新欢在鸭脷洲一间餐厅撑台脚时被捕获，两人举动亲暱，疯传女神正式“脱单”！而该名男子疑似就是与她同游日本的40岁神秘男子，昨日（22日）李佳芯返TVB为新剧《麻雀乐团》开工时就开腔回应绯闻！

李佳芯在接受TVB娱乐新闻台访问时否认恋情：“真系普通朋友食饭，系冇好消息。其实我觉得好得意，我想讲好多谢啲人咁关心我嘅感情，但系其实我系一直都会同唔同嘅朋友食饭，但系啲人可能就见到每次同男士食嘅时候就会好好奇啰，其实之前都影过好多次，甚至乎有啲呢唔系我嘅跟住就话系我嘅出咗新闻，所以我都觉得我唔想讲太多喇。（如果有新恋情肯定会公布啦？）我只可以讲冇好消息公布啰。”

早前李佳芯在IG自爆病倒，反复烧了三天，憔悴了不少，对此她就表示：“我都系第一次病住开工，开始怀疑我系咪中咗乙型流感，因为啲人话通常会瘦10磅，妈咪见到我就话‘哗，做乜瘦咗咁多呀’，跟住我先至隔一日我上磅，我真系轻咗10磅，我完全估唔到，我𠮶段时间成日觉得自己好憔悴啰，好瘦啰。”不过好彩现时已经康复！