【娱乐回归20年】网剧系王道？　亚视叶家宝：后生仔觉得电视老土

去年4月1日，亚视熄机，不少人当笑话一则收看，在家中印印脚食花生，但跟亚视忧戚与共，前亚视执董及高级副总裁叶家宝，却难掩依依不舍之情，这位亚视老臣子，见证过97年前无线跟亚视的竞争岁月，亦身处过亚视走下坡的艰苦日子，甚至因为亚视欠薪，而要被罚款15万，对亚视始终有一份感情。

曾几何时，亚视确曾有过辉煌的岁月，就是富商林百欣入主的黄金十年，虽然仍处于弱势，但节目已经保持到一定水准，甚至有威胁到无线的节目诞生，如1994年的《今日睇真D》，资讯及娱乐兼备的突破手法，为亚视赢得口碑收视，无线更急忙推出同类型节目《城市追击》迎战，在剧集方面亦有佳作，而且涉及内地文革等敏感题材的剧集，如90年的《还看今朝》、《暴雨燃烧》，完全没有自我“河蟹”。

不过自从1998年开始，内地商人相继入主亚视，亚视的制作方针，亦改动得远离了港人口味，颠峰之作已是《我和僵尸有个约会》，之后逐步减少自家制作，只以外购剧充数，亦成为了亚视远离观众的原因之一。叶家宝表示：“早期我哋系有拍剧嘅，亦有买剧返嚟播，当时都好成功，好似《三国演义》，包装咗之后出街都好多人讲，后期嘅《雍正皇朝》都系买返嚟，都好多人追，所以到最后都系内容为王。”

有指因为回归后，电视台相继要维稳，所以不再拍摄敏感题材？“我又唔系咁睇，回归之后好多题材都系照做，只系后期呢啲节目作品愈来愈多，变咗以前《还看今朝》讲文革，系电视嚟讲好出位，但后期连内地电视剧都有讲，虽然未必讲得咁深入，观众多咗接触就唔会觉得咁特别，所以我哋都唔再追求讲呢啲嘢啰。讲得多观众都未必想睇，电视都系带俾观众娱乐、教育，唔系用来成日谂啲伤痛嘅嘢。”

叶家宝讲到近年成个睇电视的习惯都已经改变，“好多人都同我讲都唔知几多年无睇电视啦，同埋佢哋钟意睇啲碎片化嘅嘢，可能系手机睇下片。早10年8年又兴起韩剧热潮，跟住内地电视嘅发展亦好迅速，佢哋嘅制作费，香港无得同佢比嘅，观众层面大，13亿观众，1亿观众睇都不得了啦，香港2、3百万人睇已经要庆功啦，所以内地可以吸纳好高嘅广告价钱，花好大嘅制作费去制作一个节目，揾好多明星买好多版权，几十部cam去做一个综艺节目，13辑嘅节目已经可以使2、3亿嘅制作费，对我哋嚟讲根本系谂都冇谂过，可能已经系我哋一年嘅成本。”

现时无线的制作，题材上已经是背靠祖国，北望神州，更被网民指已经不是属于香港人的电视台，甚至揶揄是“CCTVB”。叶家宝却认为只是因为被外边比下去，“香港本土节目依家都有嘅，只系水平有冇下降呢？睇得外边嘅嘢多，韩剧美剧内地剧，真系拍得好有水平㖞，慢慢就忽略本土嘅电视剧啰。本地嘅剧题材又翻炒呀，有啲演员又做得好夸张，对白又嚟嚟去去𠮶几句，情节亦都唔吸引，一套剧成功就猛拍续集，当然香港亦都好多制作人嘅流失，《射雕》都系香港人拍啦。”

但叶家宝对于无线经常被指拍“胶剧”，也有为昔日对手抱不平，“有时系鸡同鸡蛋嘅问题，拍啲有新意嘅嘢，观众又唔接受㖞，无线都有《天与地》，好新嘅题材，结果啲收视又唔得啦，又要去返婆妈剧，但啲人又话老土，唔会睇呀。”叶家宝说现时电视业面对的难题，是流失了后生的一群，“佢哋好难触摸架啦，成个生态都改变咗，钟意自己话事，睇乜咪睇乜啰，使乜睇你电视台嘅嘢，睇电视已经变成系一件好老土，好落后嘅事。”