【任噏乐评】当Linkin Park变成6个中佬　跌入电音的无底陷阱

事隔3年，Linkin Park上个月终于出咗第7只碟《One More Light》。仲记得年头首先派咗首《Heavy》，揾咗唱电音女歌手Kiiara合唱。当初呢首歌一出，似乎震惊咗唔少乐迷（未至于60亿人），因为音乐一起𠮶刻，连埋女声，一度以为自己听紧呢期玩电音出晒名嘅The Chainsmokers。之后紧接派台《Battle Symphony》、《Good Goodbye》，歌路都系大同小异，走唔甩EDM。喺而家电音开始成为主流年代，真心讲，同类型嘅歌手、乐队多到真系唔知拣边队听好。所以有唔少Linkin Park乐迷再次失望，眼见队band嘅热血似乎冇晒，连主音Chester好似唔想再力竭声嘶……呢种心情带到直到正式出碟。笔者听咗两日，都思疑究竟当年有Nu-Metal第一天团之称嘅Linkin Park，转型转到咁，其实系咪一种错。

喺Linkin Park身上，好似睇到佢哋嘅人生态度。一队唱Nu-Metal唱到有新境界嘅Band，初出道先廿几岁，Chester先会咁有活力同你嗌到黐肺，得闲唱下对社会嘅控诉，讲下做后生仔有咩压力，一路唱一路成长。佢哋慢慢回归平静，将当初嘅棱角慢慢磨平，走向电音、Pop路线，出现呢只碟…系人生态度嘅一个缩影。由《Minutes to Midnight》开始，转化成人生导向，几个热血青年全部变晒中佬，好啦就同唱下信望爱，行下治愈路线，反正而家都hit。

只不过无可避免嘅系，当电子音乐逐渐演化成主流，近年已经有唔少同类型音乐崭露头角，Bebe Rexha、Alan Walker，仲有好红嘅The Chainsmokers等等，都数唔晒。电子音乐嘅潮流，已经唔再系一味靠旋律洗脑吸引听众，好似玩花式咁复杂，建立鲜明风格简直难到核爆。

以前Linkin Park能够脱颖而出，因为队队Nu-Metal band都爆晒粗、又玩血腥，偏偏佢哋就又pure又true，竟然忍到口冇首歌有粗口，加上主音Chester亦刚亦柔嘅声底，真心唔唱Metal都大把嘢玩，有性格有风格，喺当时一大焦点。反观而家，有晒主题系唔错，用歌词疗愈下人心，ok fine。可惜听完10首歌之后，10首歌唔入脑，难以辨识为属于Linkin Park嘅电音，有啲捉到鹿唔识脱角，捉住个趋势但又冇咩变化，明明有个DJ（Joe Hahn）喺度，偏偏冇乜发挥。唯有单纯以耐听度，觉得成只碟最好听系《Heavy》同《One More Light》。始终听同类型嘅歌，实在有太多选择，作为放弃为Linkin Park有任何变化而挣扎嘅Fans觉得，如果转型要成功，睇怕仲有段日子咁啰。