【任噏乱评】TVB召唤旧将谷收视 居然可以有人情味到咁？
撰文： 陈奕熙
出版：更新：
TVB回巢潮一浪接一浪，突然咁多人返嚟都唔系冇原因，旧阵时，TVB好鬼高傲㗎嘛，几时轮到TVB就啲艺人呀？话一就一、话二就二，TVB说马明要踩27个钟，就踩27个钟，谂谂下要个员工OT到咁真系几冇人情味。
《全职没女》、《不懂撒娇的女人》出街之后，发现揾旧人担正的Formula好似几Work，当然打蛇随棍上，急召更多好戏之人返屋企啦，咁出杀手锏啦！咩杀手锏？咪就系同以前调转返，加少少爱心、加少少体谅，沟返啲人情味出嚟啰。
TVB都真系为咗谷人情味作咗一个好大嘅改革，就系畀啲演员有充足嘅睡眠时间，已经返咗去既宣萱同张卫健都有讲过，依家拍剧终于有觉好瞓，坦白讲瞓觉对人嚟讲真系好重要，一般打工仔一日返8-9个钟工都嗌晒救命，可想而知啲艺人日日拍十几个钟，甚至踩两三日唔瞓系几攞命。
而最贴心嘅一个行为就要数，近日传出TVB打算开拍电视剧《再创世纪》，想揾番爱女钟嘉欣做女主角，说实在嘉欣BB唔算回巢，因为佢仲未完约，还是旗下艺人，TVB想揾佢开剧大可以下十二道金牌召佢返嚟，但TVB今次就做咗个好Sweet嘅行为，传闻话虽然嘉欣BB喺剧入面占戏份唔少，但TVB都体谅佢要凑女，打算佢嘅部分喺温哥华取景。
讲真打份工大家都求开心啫，咁样你就下我、我就下你咪几好，好多时艺人离巢都不过系想出去见识下，话唔定见识完啲戏仲好咗。对员工好啲，等佢哋开心啲，离咗巢都仲肯为公司卖命，咁先可以做到Win win双赢！