东京奥运直击｜金句王李静真心话回应网民 总有一句击中你心深处
撰文： 李思咏
出版：更新：
港乒女团杀入4强，最火热的却是教练李静。他赛后接受访问，句句精警，以金句俘虏网民心。
在最后准备铜牌战的今天，李静回应各位网民，当中哪一句最啱听？
以下为整理访问资料后，以第一身书写李静回应。
讲真心话，大家啱听，我都系“港式表达”啫。
其实又唔系啲咩精警嘢，唔称得上金句嘅，大家倾偈都系讲呢啲，都系地道广东话，接地气啰。太深奥嘅我唔识讲，咪讲白啲，其实做人讲嘢同教波一样，最紧要通俗易明。
我都唔知自己咁受欢迎，当然好多谢大家咁短时间内欣赏我，但我相信我会好快消失喺大众视线，大家好快就唔记得我。
打波转数快定讲嘢转数快？梗系打波啦，打波好多即场技术判断。都系一句话啦，我随口噏，大家唔好当秘笈，我讲嘢未入流，做到老学到老啦。
我都希望大家记得，我都曾经帮香港攞过一面奥运银牌，唔好净系记住我𠮶句“好热情嘅广东话句子”。
但讲到尾我都系专注于乒乓球教学上，我唔想做主角，最紧要帮球员做主角，佢哋先系主角。教波嘅心机唔可以用数字衡量，每个教练都付出好多，最后都系想球员要斗心更加强。
系人都知我哋唔系最强嘅队伍，比赛系一分分打，奖牌系一步步攞，每场比赛之后，都系由零开始，我希望球员行得更远。
至于边套鬼片最恐怖，我都唔知，因为我本人系唔够胆睇嘅，哈哈哈，所以唔知边套鬼片壮到胆。
今天的李静，已经化成网络上的数字，金句一出，即变成Like数。但世上不是所有事情都能用数字解读的，例如教练的心血，“同女仔沟通要特别有耐性，要识氹”。8月5日香港时间早上10时，乒乓球女团铜牌战，我们期待李静金句，更要欣赏教练与球员的心血和热诚。港乒女团晋4强 李静自白：我是激情的、开放的
↓↓↓捕捉不同的李静moment，超越奥运银牌的激动：（按图放大）↓↓