巴黎残奥︱陈浩源持旗感怀身世 屋邨仔变残疾人士靠运动重启人生
巴黎残疾人奥运会（巴黎残奥）华丽揭幕，今届赛事后将会退役的轮椅羽毛球代表陈浩源担任港队其中一位持旗手，开幕礼后他在社交媒体表达感受，“呢幅将系我人生入面其中一幅最珍贵嘅相”，更表示早前知悉将会出任持旗手的消息后，“有几个晚上我都喊咗出嚟。”
陈浩源当上持旗手 感怀身世多晚落泪
陈浩源在Instagram上载两张他持旗带领港队进场的照片，“呢幅将系我人生入面其中一幅最珍贵嘅相。我想喺度讲吓，成为持旗手对我嚟讲有几咁重要，亦令我有几兴奋。”他感慨，“可能大家唔知，当我知道咗我成为持旗手嘅时候，有几个晚上我都喊咗出嚟。”
“可能系为自己骄傲，亦可能系感怀身世。我出生喺屋邨，名正言顺一个香港嘅屋邨仔。细个家境并唔富裕，到咗大个遇上一场交通意外，成为咗一个残疾人士，我冇谂过自己会点样成功，人生亦好冇自信，但系遇上运动，令我人生有180度改变。”
屋邨仔变残疾人士 全靠运动重启人生
陈浩源续称：“好多人会用钱，或者经济角度去衡量运动，但系运动带俾我嘅嘢，偏偏系钱买唔到。由一个出身底层嘅屋邨仔，残疾人士，到成为残奥奖牌运动员，今届更加成为持旗手。遇上运动，不单令我身心灵健康，更另外有一个不一样嘅人生，呢个就系运动嘅魔力。”
他最后说，“随着持旗手喺开幕礼带领中国香港队进场，亦正式宣布我哋23位残奥运动员今届嘅赛事正式展开。希望大家会大大力咁支持我地，不单止留意我哋嘅赛事，更可以留意我哋嘅故事，希望无论场内定系场外，我哋都可以感动你，证明大家知道我哋系值得被支持，值得被尊重。”
16年前交通意外截肢 曾堕谷底运动重启人生
2008年，23岁的陈浩源北上深圳工作，坐着朋友驾驶的汽车遇上交通意外，自此失去左腿，人生下半场自此改写。小时候，他爱踢足球，后来在朋友怂恿下兼玩羽毛球。意外后，这个爱好再次注入他的生命，成为轮椅羽毛球运动员。
意外后翌年加入港队，屡次在世锦赛获奖，也曾在2018亚残运赢得银牌，由于羽毛球一直不是残奥项目，他始终未能置身这个体育界最高殿堂。东京残奥首次将愈来愈受欢迎的羽毛球列入比赛项目，陈浩源在36岁那年终可踏上奥运舞台。
上届残奥因役情延期 不甘摘铜39岁再征奥
他是全球顶尖的轮椅羽毛球运动员，以残奥金牌为目标，不幸遇上役情东京奥运和残奥会均延期一年，最终获得一面铜牌，他不服气，坚持打多一届，日前他以长文决志：“今次系我第二次参加残奥会，亦会系最后一次。跌跌撞撞，做咗运动员16年，可以参加奥运会，系运动员嘅梦想，到咗35岁，残奥终于有羽毛球项目，因为疫情，延后咗一年，喺奇怪嘅情况下得到铜牌，唔忿气！选择再顶多3年，再打过！”
“呢3年长期同伤患共存，面对好多年轻运动员唔会遇到嘅问题，但系‘条路自己拣’，冇得怨，唯有顶硬上。可以去到两次残奥，完梦两次！而可以喺最高嘅舞台度完成自已嘅最后一场国际赛事，就好似施丹喺世界杯度挂靴一样，更加系我第一日做运动员嘅梦幻结束方式。”
“我等大家认得我，同埋等你地句加油”
他很开心自己“讲得出，做得到”，今届再以奖牌为目标，同时“希望自己可以健健康康咁完成呢一届奥运，只有身体健康，只可以将训练嘅水平实实在在咁表现出嚟，我希望可以令所有香港嘅观众喺电视度睇到我嘅真实水平，亦可能系香港最后一个轮椅羽毛球选手嘅最高水平同最好表现。我希望香港嘅市民可以为香港有一个成功，水平高嘅轮椅羽毛球运动员而感到骄傲。”
他亦希望可以弥补上届残奥的遗憾，“上一届我有讲过，希望市民可以记住我哋24位残奥代表个样，结果我哋成届都戴住口罩，市民应该唔系太记得我哋个样。今届我哋再次有23个代表，今次我哋唔再戴口罩，所以希望大家可以好好咁样记住我哋个样，如果系街度见到我哋认得我哋，过嚟同我哋讲一声加油或者打一个气，令我哋充满能量咁样去巴黎出战，亦令我哋知道我哋拣呢一条辛苦而回报唔成正比嘅运动员之路系冇拣错！所以，我等大家认得我，同埋等你地句加油。”
▼开幕礼表演▼
巴黎残奥赛事共有约4400名运动员参加，港队派出9男14女共23人，陈浩源与乒乓球代表王婷莛共同担任港队持旗手，两人同样于上届东京残奥夺铜。