Celine妹妹《全美一叮》成功晋级　7万骚价有排升

近期备受关注的Celine妹妹因为《全美一叮》而爆红，好多人都关注到底这位只得9岁的小妹妹能唔能够喺《全美一叮》继续晋级，而答案系，成功！而且仲要系四位评判一致通过，成为史上第一位晋级赛事嘅香港人。大会宣布佢入围之后，一直喺后台打气嘅Celine爸爸谭顺生、妈咪同妹妹Dion兴奋到立刻嚟个“爱的抱抱”。心情咁好，似乎Celine同爸爸都完全无畀近日嘅新闻影响到。

囡囡咁叻，全家人都当然开心。其实Celine喺参加《全美一叮》前已经参加过唔少公开表演同比赛，行内嘅知名度亦相当高。更加有知情人士透露，原来Celine妹妹喺今次爆红之前，每次嘅出骚价钱已经高达7万，虽然行内童星嘅骚钱一向都系比较理想，但系7万呢个价钱实在系唔简单，而家Celine妹妹愈嚟愈红，愈战愈勇，深信之前揾过Celine妹妹出骚嘅客户都一定觉得物超所值！至于爆红后，唔知个价位有无几何级数咁跳呢？

一齐嚟睇返赛事嘅花絮

虽然官方未有片出街，不过见到Celine参加比赛仍然充满信心，面带笑容参加演出，作为观众见到都替佢开心。虽然好多人都话佢喺摇钱树云云，但老老实实，你有无见过一个9岁小朋友畀阿爸阿妈逼做功课系会笑得咁开心？起码我无见过。小朋友嘅世界好简单，大人嘅世界好复杂，不论你觉得Celine妹妹唱成点，观众睇得开心，小妹妹唱得Enjoy系不争嘅事实，即使你可能唔钟意佢身边嘅人，但讲到尾都同呢位小妹妹本身嘅意向无关。每个人嘅童年都有一个梦想，如果佢哋想做银行家就畀人话贪钱，想做歌星就系贪慕虚荣，想做医生律师就系畀家长影响，难道你想每个小朋友都同你讲“我大个要揸巴士”你先觉得佢哋贴地？职业无分贵贱嘅时候，点解又要反向认为钟意唱歌就系唔好？其实喺小朋友嘅世界，佢钟意做嘅事情，系唔会以金钱为厘定准则。